తోటకూర అల్లం పచ్చి మిర్చి కూర.

తోటకూర అల్లం పచ్చి మిర్చి కూర.

 ఆలూరి కృష్ణ ప్రసాద్ 

కావలసినవి .

లేత తోటకూర కట్టలు -- మూడు

అల్లం --- రెండు అంగుళాల ముక్క .

పచ్చి మిర్చి -- కారాన్ని బట్టి 8 నుండి పది వరకు.

మినప్పిండి చిన్న వడియాలు -- 15.

ఉప్పు -- తగినంత .

పోపుకు .

నూనె -- 100 గ్రాములు.

ఎండుమిరపకాయలు -- నాలుగు

ముక్కలుగా చేసుకోవాలి

చాయ మినపప్పు -- రెండు స్పూన్లు .

ఆవాలు -- అర స్పూను 

జీలకర్ర -- పావు స్పూను .

తయారీ విధానము .

ముందుగా తోటకూర శుభ్రంగా ఇసుక లేకుండా ఒకటి రెండు సార్లు కడిగి సన్నగా తరుగు కోవాలి .

కాడలు లేతగా ఉన్నవి కూడా కలిపి తరగ వచ్చు.

తరిగిన కూర వేరే పెట్టుకోవాలి .

అల్లం ముక్క పై చెక్కుతీసి ముక్కలుగా కట్ చేసుకొని , పచ్చి మిరపకాయలు ఉప్పు వేసి మిక్సీలో కొంచెం మెత్తగా వేసుకోవాలి .

ఇప్పుడు స్టౌ వెలిగించి బాండీ పెట్టి నూనె పోసి నూనె కాగగానే ముందుగా వడియాలు వేయించి వేరే ప్లేటులో పెట్టుకోవాలి .

ఇప్పుడు అదే నూనెలో ఎండు మిర్చి , చాయ మినపప్పు , జీలకర్ర , ఆవాలు వేసి పోపు పెట్టు కోవాలి .

పోపు వేగగానే అల్లం పచ్చి మిర్చి ముద్ద అందులో వేసి రెండు నిముషాలు పచ్చి వాసన పోయేదాకా వేయించాలి .

తర్వాత తరిగి ఉంచుకున్న తోటకూర అందులో వేసి మూత పెట్టి పది నిముషాలు సన్నని సెగన మగ్గ నివ్వాలి.

తోటకూర మగ్గేటప్పుడు నీళ్ళు స్వతహాగా బయటకు వస్తాయి .

మీరు ప్రత్యేకంగా పోయనవసరం లేదు.

కూర మగ్గి ఇంకా కూరలో నీళ్ళ తడి ఉంటే మూత తీసి మూడు నిముషాలు పాటు మగ్గనిస్తే కూర లో నీరు ఇగిరి పోతుంది .

ఈ కూరలో అల్లం పచ్చి మిర్చి కారం సరిపోతుంది .

వేరే ఎండుకారం వేయకండి . రుచి పాడవుతుంది .

కరివేపాకు , కొత్తిమీర కూడా వేయనవసరం లేదు .

తోటకూర కూర రెడి అయ్యింది .

మనం భోజనం చేసే ముందు పిండి వడియాలు అప్పటికప్పుడు కూరలో కలుపుకుని వడ్డించుకుంటే వడియాలు కర కర లాడుతూ కూర తినేటప్ఫుడు ఎంతో రుచిగా ఉంటుంది .