ములక్కాడ సాంబారు .

ములక్కాడ సాంబారు .

  ఆలూరి కృష్ణ ప్రసాద్ 

కావలసినవి

కందిపప్పు -- 100 గ్రాములు 

చింతపండు -- 50 గ్రాములు.

ములక్కాడలు -- రెండు

సొరకాయ లేతది -- ఒక ముక్క

బెండకాయలు -- ఎనిమిది

ఉల్లిపాయలు -- రెండు 

పచ్చిమిర్చి -- నాలుగు 

కరివేపాకు -- మూడు రెమ్మలు

పసుపు - పావు స్పూను 

ఉప్పు -- తగినంత .

బెల్లం -- కొద్దిగా . 

 ఇష్టపడని వారు మానేయవచ్చు.

కొత్తిమీర -- ఒక కట్ట

----------------------------------------------

సాంబారు ముద్ద తయారీ విధానము .

కావలసినవి .

ఎండుమిరపకాయలు - 4

పచ్చి శనగపప్పు -- మూడు స్పూన్లు .

ధనియాలు --- మూడు స్పూన్లు 

జీలకర్ర -- పావు స్పూను 

బియ్యం -- రెండు స్పూన్లు 

మిరియాలు -- 6

ఇంగువ -- కొద్దిగా 

ఎండు కొబ్బరి --పావు చిప్ప 

చిన్న ముక్కలుగా కట్ చేసుకోవాలి.

నూనె -- నాలుగు స్పూన్లు .

తయారీ విధానము .

స్టౌ వెలిగించి బాండి పెట్టి నూనె వేసి నూనె బాగా కాగగానే వరుసగా ఎండుమిర్చి , శనగపప్పు ,ధనియాలు, జీలకర్ర , మిరియాలు , ఇంగువ , ఎండు కొబ్బరి ముక్కలు వేసి ఎర్రగా వేయించు కోవాలి .

చివరగా బియ్యము వేసి ఒక నిముషము సేపు ఉంచి దించుకోవాలి .

చల్లారాక మిక్సీలో ఈ దినుసులన్నీ వేసుకుని మెత్తగా పొడిలా వేసుకోవాలి .

మేము తగినన్ని నీళ్ళుపోసి దానిని మెత్తగా ముద్దలా చేసుకుంటాము .

పులుసుకు బాగా పడుతుందని ముద్దగా వేస్తాము .

----------------------------------------------

పొపుకు కావలసినవి.

ఎండుమిర్చి --- రెండు

ఆవాలు --- పావు స్పూను 

ఇంగువ -- కొద్దిగా 

నూనె -- రెండు స్పూన్లు

---------------------------------------------

సాంబారు తయారీ విధానము .

ముందుగా చింతపండు పావుగంట సేపు వేడి నీళ్ళలో నానబెట్టి చిక్కగా రసం తీసుకోవాలి .

ఈ రసం ఒక పెద్ద గిన్నెలో తీసుకోవాలి .

అందులో పసుపు , పచ్చి మిర్చి ముక్కలు , కరివేపాకు , తగినంత ఉప్పు వేయాలి .

బెల్లం ఇష్ట పడే వారు వేసుకోవాలి

గిన్నెలో ముప్పావు వంతు నీళ్ళు చింతపండు రసం లో పోసుకోవాలి .

కందిపప్పు శుభ్రంగా కడిగి ఒక గిన్నెలో వేసి అందులో తగినన్ని నీళ్ళు పోసి కుక్కర్ లో పెట్టి స్టౌ వెలిగించి కుక్కర్ పెట్టి మూడు విజిల్స్ రాగానే స్టౌ ఆపెయాలి.

ఈ లోగా కూరలన్నీ ముక్కలుగా తరుగుకుని చింతపండు రసం సిద్ధం చేసుకున్న గిన్నెలో వేసి ,

స్టౌ మీద పెట్టి ముక్కలన్నీ మెత్తగా ఉడికే దాకా తెర్ల నివ్వాలి.

ఉడికిన కందిపప్పు గరిటతో మెత్తగా యెనిపి ఉడుకుతున్న పులుసులో వేసి మరో పది నిముషాలు తెర్లనివ్వాలి .

చివరగా పైన చెప్పిన విధంగా సిద్ధం చేసుకున్న సాంబారు ముద్ద అందులో వేసి మరో పది నిముషాలు మరగ నివ్వాలి.

దింపాక కొత్తిమీర వేసుకోవాలి .

తర్వాత పైన పోపు పెట్టుకోవాలి .

అంతే అన్నం లోకి , ఇడ్లీల లోకి మరియు పూరీల లోకి వేడి వేడిగా పొగలు కక్కుతున్న ములక్కాడ సాంబారు సర్వింగ్ కు సిద్ధం.