వెజిటబుల్ రైస్

ఆలూరుకృష్ణప్రసాదు .

వెజిటబుల్  రైస్.

కావలసినవి .

బియ్యము  --  ఒక గ్లాసు .
క్యారెట్లు  --  2
క్యాప్సికమ్  -- 2
ఉల్లిపాయలు  --  2
బీన్స్  --  100  గ్రాములు. చిన్న ముక్కలుగా  చేసుకోవాలి .
నెయ్యి  --  మూడు  స్పూన్లు .
జీడిపప్పు   -- 10 

పొడికి .

నెయ్యి  --  రెండు స్పూన్లు .
ఎండుమిర్చి  - 5 
మినపప్పు  --  స్పూను
శనగపప్పు  --  స్పూను
వేరు శనగ గుళ్ళు  -  రెండు స్పూన్లు 
నువ్వుపప్పు  --  రెండు స్పూన్లు
ఎండు కొబ్బరి  --  పావు చిప్ప చిన్న ముక్కలుగా  చేసుకోవాలి .
ఉప్పు  --  తగినంత

స్టౌ  మీద  బాండీ పెట్టి  నెయ్యి వేసి ముందుగా  జీడిపప్పు  వేయించుకుని  విడిగా  తీసి ఉంచుకోవాలి .
తర్వాత   పై దినుసులన్నీ  వేసి వేయించుకుని , సరిపడా  ఉప్పు వేసి  మిక్సీ లో మరీ మెత్తగా  కాకుండా  పొడి  కొట్టుకుని  ఉంచుకోవాలి .

తయారీ విధానము .

ముందుగా  గ్లాసు  బియ్యము సరిపడా
నీళ్ళు పోసి కుక్కర్ లో పొడిగా  వండుకోవాలి .

వెజిటబుల్స్  అన్నీ చిన్న ముక్కలుగా  తరిగి  ఉంచుకోవాలి .

ఇప్పుడు  స్టౌ  మీద  బాండీ  పెట్టి  మూడు స్పూన్లు  నెయ్యి వేసి నెయ్యి బాగా కాగగానే , ముందుగా  ఉల్లిపాయలు , క్యారెట్ ముక్కలు , క్యాప్సికమ్ ముక్కలు , బీన్స్ ముక్కలు వేసి  కొద్దిగా  ఉప్పువేసి  మూతపెట్టి  ముక్కలను  పది నిముషాలు  మెత్తగా  మగ్గ నివ్వాలి.

తర్వాత  అందులో  ఉడికించి  సిద్ధంగా  ఉంచుకున్న  అన్నం  వేసుకుని  గరిటతో  బాగా కలుపుకోవాలి .

ఇప్పుడు   సిద్ధంగా  ఉంచుకున్న  పొడి  నాలుగు స్పూన్లు  వేసుకుని   మరో మూడు స్పూన్లు  నెయ్యి వేసి  బాగా కలుపుకుని పైన  నేతిలో వేయించిన  జీడిపప్పు  వేసుకుని   వేరే  డిష్  లోకి తీసుకోవాలి .

అంతే  ఎంతో రుచిగా  ఉండే  వెజిటబుల్  రైస్  సర్వింగ్  కు సిద్ధం.

కొబ్బరి పాలతో రైస్ పొంగల్

కొబ్బరి పాలతో  రైస్ పొంగల్.

కొబ్బరి  పాలు -- ఒక గ్లాసు.
కొబ్బరి కాయను పగుల గొట్టి చిప్పలను పచ్చి
కొబ్బరి కోరాముతో తురుముకుని  ఒకసారి మిక్సీ  వేసుకుని ఒక గుడ్డలో వేసుకుని 
కొబ్బరి పాలు తీసుకోవాలి .  

తిరిగి  తురుము మరోసారి  మిక్సీలో వేసి కొద్దిగా  నీళ్ళుపోసి  మరోసారి మిక్సీ  వేసుకుని  తిరిగి  పాలు తీసుకోవాలి .

ఈ విధముగా  ఒక గ్లాసు కొబ్బరి  పాలు తీసుకుని  సిద్ధముగా ఉంచుకోవాలి.

చాయపెసరపప్పు --  పావు గ్లాసు . అరగంట ముందుగా  నానబెట్టి  ఉంచుకోవాలి.
నెయ్యి -  5 స్పూన్లు
ఉల్లిపాయ  --  ఒకటి
టమోటో  --  ఒకటి
పచ్చిమిర్చి  -- రెండు
కరివేపాకు  -- మూడు రెమ్మలు
కొత్తిమీర  --  చిన్న కట్ట
పొదినా --  చిన్న కట్ట
లవంగాలు  -- 4
మిరియాలు  -- 6
జీడిపప్పు  -- పది పలుకులు
ఉప్పు  -- తగినంత

తయారీ విధానము .

ముందుగా  స్టౌ మీద కుక్కర్  పెట్టి అందులో మూడు స్పూన్లు  నెయ్యి వేసి  జీడిపప్పు , లవంగాలు , మిరియాలు వేయించుకోవాలి .

ఆ తర్వాత అందులో తరిగిన టమోటో ముక్కలు , ఉల్లిపాయ  ముక్కలు మరియు పచ్చిమిర్చి  ముక్కలు వేసి పైన మూత పెట్టి మగ్గనివ్వాలి.

తర్వాత తరిగిన పొదినా, కరివేపాకు  మరియు  తరిగిన కొత్తిమీర  వేసి  కొద్దిసేపు మగ్గనిచ్చి అందులో గ్లాసు  కొబ్బరి పాలు మరియు గ్లాసు నీళ్ళు , తగినంత  ఉప్పు , గ్లాసు నానబెట్టిన బియ్యము మరియు పావు గ్లాసు నానబెట్టిన పెసర పప్పు వేసి కుక్కర్ మూతపెట్టి  విజిల్ పెట్టి  మూడు విజిల్స్ రానిచ్చి దింపు కోవాలి .

విజిల్  ఊడి రాగానే  మిగిలిన నెయ్యి మొత్తము  వేసి  గరిటతో  బాగా కలుపుకుని, టమోటో  మరియు కొత్తిమీర  చట్నీతో కాని  లేదా అల్లం  చట్నీతో కాని   సర్వింగ్  చేసుకోవాలి.

స్వీట్ కార్న్ జీరా రైస్

స్వీట్  కార్న్  మరియు  జీరా  రైస్.

కావలసినవి .

స్వీట్ కార్న్  --  గింజలను  వలుచుకుని  ఒక కప్పు  సిద్ధం  చేసుకోవాలి .
బియ్యము  --  ఒక  గ్లాసు .
జీలకర్ర   --   30  గ్రాములు కొద్దిగా  కచ్చాపచ్చాగా  దంచుకోవాలి .
లవంగాలు  --  10 
జీడిపప్పు  --  15 
మిరియాల  పొడి  --  పావు స్పూను
నెయ్యి  --  50  గ్రాములు
ఉప్పు  --   తగినంత .
కొత్తిమీర  --  ఒక కట్ట  సన్నగా  తరుగు కోవాలి .

తయారీ విధానము .

ఒక గ్లాసు  బియ్యము  గిన్నెలో పోసుకుని  కడిగి  రెండు గ్లాసుల  నీళ్ళు పోసుకుని     పదిహేను  నిముషాల పాటు  నానబెట్టు కోవాలి .

ఆ తర్వాత   స్టౌ  మీద పెట్టి పొడిగా  వండుకోవాలి .

స్టౌ  మీద  బాండీ  పెట్టి  మొత్తము  నెయ్యి  వేసి  నెయ్యి  బాగా  కాగగానే   ముందుగా  జీడిపప్పు  వేయించుకుని  వేరే ప్లేటులో  పెట్టుకోవాలి .

ఆ తర్వాత  అదే  బాండీలో కచ్చాపచ్చాగా దంచిన  జీలకర్ర , లవంగాలు వేసి వేయించుకుని  తర్వాత  స్వీట్ కార్న్ , మిరియాల  పొడి  సరిపడా  ఉప్పు వేసి  స్వీట్ కార్న్  మగ్గగానే  ఉడికిన  అన్నం కూడా  గరిటతో  వేసుకుని   నాలుగు  మూలలా  గరిటతో  బాగా  కలుపుకోవాలి .

సన్నగా  తరిగిన  కొత్తిమీర  కలుపుకోవాలి .

చివరలో  జీడిపప్పు   కూడా  కలుపుకోవాలి .

అంతే  నేతి  వాసనతో  ఘమ  ఘమ  లాడే  స్వీట్  కార్న్  జీరా  రైస్  సర్వింగ్ కు  సిద్ధం.

ఇందులో రెండు కప్పుల  పెరుగులో  సన్నగా  తరిగిన  పచ్చి  ఉల్లిపాయలు , మూడు  పచ్చి మిరపకాయలు , కొత్తిమీర , కరివేపాకు , తగినంత  ఉప్పు  వేసి  చేసిన  పెరుగు  చట్నీ  బాగుంటుంది .