కరివేపాకు కారప్పొడి

కరివేపాకు కారప్పొడి

 ఆలూరి కృష్ణ ప్రసాద్ 

ప్రియమైన మిత్రులారా !

ఈ రోజు మీ అందరికీ ప్రాచీన వంటకం మన తాతమ్మల తరం నుంచి వచ్చిన కరివేపాకు కారప్పొడి గురించి వివరిస్తాను .

ఈ కరివేపాకు కారప్పొడి బాలింతలకు పథ్యంగా పెడతారు.

జ్వరపడి పథ్యం పెట్టే వారికి కూడా పెట్టవచ్చు .

నోరు అరుచిగా ఉన్నప్పుడు , బాగా జలుబు చేసినప్పుడు , కడుపులో ఇబ్బందిగా ఉన్నప్పుడు మేము తరచుగా ఈ కారప్పొడి కొట్టుకుంటాము .

ఈ కరివేపాకు కారప్పొడి కొట్టగానే వాసన పోకుండా ఒక సీసాలో పోసుకుంటే ఘమ ఘమ లాడే సువాసనతో నెల రోజుల పైనే నిల్వ ఉంటుంది .

ఈ కారప్పొడి తయారు చేయడంలో మీ టాలెంట్ అంతా వేయించడం లోనే ఉంటుంది.

వేపు అటూ ఇటు అయితే మనం అనుకున్న రుచి రాదు .

ఈ కరివేపాకు కారప్పొడి లో వెల్లుల్లి పాయలు తప్పని సరిగా వేయాలి .

వెల్లుల్లి పాయలు వేస్తేనే ఆరోగ్య పరంగా ప్రయోజనం ఉంటుంది .

ఇక వెల్లుల్లి మాట మా ఇంట్లో వినపడకూడదు అనుకునే వాళ్ళు లేకుండా చేసుకోండి .

అసలు రుచి కూడా వెల్లుల్లి పాయలు వేసుకుంటేనే వస్తుంది.

కరివేపాకు కారప్పొడికి కావలసిన పదార్థములు .

కరివేపాకు ఒక 15 రెమ్మల ఆకు దూసుకోవాలి .

ఎండు మిరపకాయలు -- 15 నుండి 18 వరకు .

చాయ మినపప్పు --- 4 టీ స్పూన్లు .

ధనియాలు --- 50 గ్రాములు

జీలకర్ర --- పావు స్పూన్

ఆవాలు -- పావు స్పూన్

వెల్లుల్లి రెబ్బలు -- పై పొట్టు తీయకుండా ఒక 15.

పొట్టు తీసి వేస్తే కారప్పొడి పేస్టు అవుతుంది .ఘాటు వాసన వస్తుంది కారప్పొడి .

ఉప్పు --- తగినంత

చింతపండు -- ఒక నిమ్మ కాయ సైజు .

నూనె -- 5 లేక 6 స్పూన్లు .

అంతే .

ఇంక కరివేపాకు కారప్పొడి తయారు చేయు విధానము .

ముందుగా కరివేపాకు కడిగి ఆరబోసుకోండి .

తడి ఉండకూడదు . పొడిగా ఉండాలి .

స్టౌ వెలిగించి బాండి పెట్టి మూడు స్పూన్లు నూనె వేసి , నూనె బాగా కాగాక కరివేపాకు మెత్తదనం పోయేదాకా వేయించి పక్కన వేరే ప్లేటులో పెట్టుకోండి .

తర్వాత స్టౌ మీద మళ్ళీ బాండీ పెట్టి నాలుగు స్పూన్లు నూనె వేసి నూనె బాగా కాగాక ఎండు మిరపకాయలు , ధనియాలు వేసి కమ్మని వేపు వాసన వచ్చే దాకా వేయించండి . ఇప్పుడు జీలకర్ర , ఆవాలు వేసి అట్లకాడతో కలుపుతుండండి . ఆవాలు చిటపటలాడాక దింపి ఒక అయిదు నిముషాలు చల్లార నివ్వండి.

చింతపండు ఈనెలు , గింజలు లేకుండా శుభ్రం చేసుకోండి .

చాయమినపప్పు ఒక స్పూన్ నూనె వేసి విడిగా వేయించి ప్రక్కన పెట్టుకోండి .

మిక్సీలో వేయించిన ఎండుమిరపకాయలు , ధనియాలు , ఆవాలు , జీలకర్ర , తగినంత ఉప్పు వేసి రెండుసార్లు తిప్పండి.

ఇప్పుడు చింతపండు , వేయించిన కరివేపాకు వేసి మరో రెండుసార్లు తిప్పండి

ఆ తర్వాత వెల్లుల్లి పాయలు వేసి ఒకసారి తిప్పండి .

ఇప్పటికే మీ వంట గదంతా చక్కని కరివేపాకు , వెల్లుల్లి వాసనల సువాసనలతో ఘుమ ఘమ లాడి పోతుంది .

ఇప్పుడు ఈ మిశ్రమమంతా ఒక పళ్ళెంలోకి తీసుకొని, వేయించి పక్కన పెట్టుకున్న చాయమినపప్పు అందులో వేసి చేత్తో బాగా కలుపుకొని నలగని చింతపండు చేతికి తగిలితే తీసేయండి .

ఉప్పు సరిపోయిందో లేదో నోట్లో వేసుకుని చూసుకొని , చాలక పోతే తగినంత కలుపుకోండి .

వాసన పోకుండా శుభ్రంగా తుడిచిన గాజు సీసాలో పెట్టుకుంటే నెల రోజుల పైన నిల్వ ఉంటుంది .

వేడి వేడి అన్నంలో మూడు స్పూన్లు నెయ్యి వేసుకుని , అందులో ఈ కరివేపాకు కారప్పొడి వేసుకొని ముందుగా తినండి .

ఆ రుచి అహా అద్భుతః .

ఇందులో పచ్చి శనగపప్పు , మెంతులు , పసుపు, ఎక్కువ జీలకర్ర , ఎక్కువ ఆవాలు , ఇంగువ వాడకూడదు .

ఆరోగ్య ఫలితాలు పొందాలంటే నేను చెప్పిన విధంగానే తయారు చేసుకోవాలి.