దోసకాయ పప్పు .

 దోసకాయ పప్పు .

 ఆలూరి కృష్ణ ప్రసాద్ 

ఆ మాత్రం దోసకాయ పప్పు చేసుకోవడం కూడా రాని వారుంటారా ?

ఇదొక రెసిపీ నా ? అని అనుకోవద్దు .

ఇప్పుడంతా కొత్త పోకడల వంటలు కదా .

దోసకాయ పప్పు అని చెప్పగానే వెంటనే

1. ఇందులో చింతపండు బదులు మామిడి కాయ ముక్కలు వేసుకుంటే taste అదిరి పోతుంది

2. మేము దోసకాయతో పాటు ఉల్లిపాయల బదులుగా టమోటో లు వేసుకుంటాము .

3. మేం దోసకాయ పప్పు లో చింతపండు వేయం . కొండ గోంగూర వెసుకుంటాం.

4 ఈ సారి ఇంగువ బదులు నాలుగు వెల్లుల్లి రెబ్బలు పోపులో తగిలించండి . Taste అదిరిపోతుంది .

5 . మేము గరమ్ మసాలా పొడి ఒక స్పూను వేసుకుంటాము .

ఈసారి మీరు కూడా తగిలించండి.

ఇలా రక రకాల కామెంట్లు కనిపిస్తాయి .

అలా మార్చి చేయడం తప్పని కాదు .

ఎవరి అభిరుచి ప్రకారం వాళ్ళు చేసుకోవచ్చు .

అయితే అసలు దోసకాయ పప్పు రెసిపీ మిస్ కాకూడదు కదా .

అంటే traditional రెసిపీ .

ఇంక అసలు కధ లోకి వద్దాము .

దోసకాయ పప్పు .

కావలసినవి .

కందిపప్పు ---- ఒక పెద్ద గ్లాసు .

పసుపు పచ్చని గట్టిగా ఉండే 

 దోసకాయ --- పెద్దది ఒకటి .

ఉల్లిపాయలు -- మూడు .

పచ్చి మిర్చి --- ఆరు .

చింతపండు --- నిమ్మకాయంత

కారం -- ఒక స్పూను

పసుపు --- పావు టీ స్పూను

ఉప్పు --- తగినంత

కరివేపాకు --- రెండు రెమ్మలు

పోపుకు .

నూనె --- మూడు స్పూన్లు

ఎండుమిరపకాయలు -- మూడు 

తుంపుకుని ముక్కలు చేసుకోవాలి .

మెంతులు -- పావు స్పూను

జీలకర్ర --- పావు స్పూను

ఆవాలు --- అర స్పూను

ఇంగువ --- కొద్దిగా .

కరివేపాకు --- రెండు రెమ్మలు .

తయారీ విధానము .

ముందుగా దోసకాయ పై చెక్కు తీసుకుని ముక్క , గింజలు చేదు ఉన్నాయో లేదో చూసుకుని , గింజలతో సహా ముక్కలు గా తరుగుకోవాలి .

ఉల్లిపాయలు ముక్కలుగా తరుగు కోవాలి .

చింతపండు విడదీసి కొద్ది నీళ్ళతో తడిపి ఉంచుకోవాలి .

పచ్చి మిర్చి నిలువుగా తరుగు కోవాలి .

మేము మా ఇంట్లో ఏ వంటకైనా కుక్కర్ వాడము .

గిన్నెలలోనే చేసుకుంటాము .

ముందుగా ఒక గిన్నెలో కందిపప్పు వేసి ఒకసారి కడిగి తగినన్ని నీళ్ళు పోసి స్టౌ మీద పెట్టి పప్పు మూడు వంతులు ఉడకనివ్వాలి .

ఉప్పు ముందు వేయ వద్దు .

పప్పు ఉడకదు .

తర్వాత దోసకాయ ముక్కలు , ఉల్లిపాయ ముక్కలు , తడిపిన చింతపండు , పచ్చిమిర్చి , కరివేపాకు , పసుపు వేసి మూత పెట్టి మరో పది నిముషాలు పూర్తిగా ఉడకనివ్వాలి .

తర్వాత ఒక స్పూను కారం , తగినంత ఉప్పువేసి రెండు నిముషాలు ఉడక నిచ్చి దింపు కోవాలి .

ఇప్పుడు స్టౌ మీద బాండీ పెట్టి మూడు స్పూన్లు నూనె వేసి నూనె బాగా కాగగానే ముందు మెంతులు వేసి వేగనివ్వాలి .

తరువాత వరుసగా ఎండుమిర్చి ముక్కలు , జీలకర్ర , ఆవాలు , ఇంగువ మరియు కరివేపాకు వేసి పోపు వేగగానే పప్పులో పోపు పెట్టుకుని గరిటతో బాగా కలుపుకోండి .

అంతే . ఇంగువ ఘమ ఘమ తో ఎంతో రుచిగా ఉండే ప్రాచీన వంటకం దోసకాయ పప్పు సర్వింగ్ కు సిద్ధం.

ఈ పప్పు అన్నం లోకి రోటీలలోకి కూడా బాగుంటుంది .

దోసకాయ పప్పు లో పాత తరం వాళ్ళు పప్పులో ఉల్లిపాయ వేస్తే దేవునికి నైవేద్యానికి పనికి రాదని , చాలా మంది ఇళ్ళల్లో పెద్ద ఉల్లిపాయ కూడా తినక పోవడం వల్ల ఉల్లిపాయ వేయకుండానే చేసేవారు.

మేం ఉల్లిపాయ వేసి ఒక సారి వేయకుండా మరోసారి రెండు రకములుగా కూడా చేసుకుంటాము .

నిజానికి 100% ప్రాచీన దోసకాయ పప్పు వంటకం ఉల్లిపాయ వేయనిదే.