కూటు

కూటు

ఆలూరి కృష్ణ ప్రసాద్

ప్రియమిత్రులారా !

ఈ రోజు పెసర పప్పు లేదా కందిపప్పు తో కూటు చేయడం గురించి మీకు తెలియచేస్తాను.

ఈ కూటుకు లేత ఆనపకాయ కానీ లేత బూడిద గుమ్మడికాయ కాయ కాని వేసుకోవాలి .

కావలసిన పదార్ధములు ; ---

కందిపప్పు లేదా 

పెసరపప్పు --- ఒక కప్పు

పచ్చిమిర్చి --- మూడు

చింతపండు --- నిమ్మకాయంత

నానబెట్టి గుజ్జు తీసుకోవాలి.

లేత ఆనపకాయ లేదా

లేత గుమ్మడికాయ -- చిన్నది - 1

కరివేపాకు --- మూడు రెమ్మలు

మినపప్పు --- ఒక స్పూన్

ఆవాలు --- 1/2 స్పూన్

ఇంగువ --- కొద్దిగా 

జీలకర్ర --- పావు స్పూను 

నూనె --- తగినంత 

పసుపు -- కొద్దిగా 

ఎండుమిర్చి -- మూడు

ఉప్పు -- తగినంత .

కూటు పొడికి కావలసిన దినుసులు ; --

ధనియాలు -- రెండు చెంచాలు 

జీలకర్ర --- అర చెంచా

మిరియాలు -- పావు చెంచా

ఎండు మిర్చి -- ఐదు లేక ఆరు

పచ్చి కొబ్బరి తురుము -- పావు కప్పు.

తయారు చేయు విధానము ; ---

ముందుగా కూటు దినుసులన్నీ నూనె లో వేయించి చల్లారాక

మిక్సీలో మెత్తని పొడిగా చేసుకోవాలి .

కందిపప్పు లేదా పెసర పప్పు శుభ్రంగా కడిగి కుక్కర్ లో వేసి తగినన్ని నీళ్ళు పోయాలి . అందులో పై చెక్కు తీసిన లేత ఆనపకాయ లేదా బూడిద గుమ్మడికాయ ముక్కలు సన్నగా తరిగి తగినంత పసుపు , పచ్చి మిర్చి ముక్కలు , కరివేపాకు రెమ్మలు వేసి నాలుగు లేదా ఐ దు కూతలు వచ్చేదాకా ఉడికించాలి.

ఉప్పు ముందు వేయకూడదు.

వేస్తే పప్పు ఉడకదు.

ఆ తర్వాత చింతపండు మిశ్రమం , ముందు మనం సిద్ధం చేసుకున్న కూటు దినుసుల పొడి , తగినంత ఉప్పు వేసి కుక్కర్ విజిల్ తీసి మరో మూడు లేదా నాలుగు నిముషాలు ఉడికించాలి ,

ఆ తర్వాత స్టౌ మీద బాండీ పెట్టి మూడు స్పూన్లు నూనె వేసి , నూనె బాగా కాగగానే , వరుసగా మూడు ఎండుమిర్చి ముక్కలుగా తుంపి , మినపప్పు , ఆవాలు , జీలకర్ర , ఇంగువ , మరియు రెండు రెమ్మలు కరివేపాకు వేసి పోపు వేయించి కూటులో కలపాలి .

ఘమ ఘమ లాడే కూటు అన్నం లేదా చపాతీలలోకి రెడీ .

ఈ ఫోటో లోని కూటు పెసర పప్పు తో చేసినది .