మైసూర్ రసం

మైసూర్ రసం 

ఆలూరి కృష్ణ ప్రసాద్

తయారీ విధానం.

కావలసిన పదార్ధములు ; ---

పచ్చి శనగపప్పు -- 50 గ్రాములు

చింతపండు --- 25 గ్రాములు

టమోటాలు --- ఓ మాదిరి సైజువి -- 4

కరివేపాకు --- మూడు రెమ్మలు 

 కొత్తిమీర --- ఒక చిన్న కట్ట 

పచ్చి మిరపకాయలు -- 3

మైసూర్ రసంలోకి ముద్ద తయారీ విధానం.

కావలసిన పదార్ధములు ---

ఎండు మిరపకాయలు -- 3

ధనియాలు --- 2 టీ స్పూన్లు

పచ్చి శనగపప్పు -- 1 స్పూన్ 

ఆవాలు -- తగినన్ని

మిరియాలు -- పావు టీ స్పూన్ 

ఇంగువ -- తగినంత

పచ్చి కొబ్బరి --- చిన్న గరిటెడు

--- తురిమినది .

తయారు చేయు విధానం ---

ముందుగా పచ్చి శనగపప్పు కడిగి తగినన్ని నీళ్ళు పోసి స్టౌ మీద పెట్టి సగానికి పైగా ఉడక నివ్వాలి .

అలా ఉడికుతున్న సమయంలో టమోటాలు కాస్త పెద్ద ముక్కలుగా తరిగి అందులో వేసి ఉడక నివ్వాలి .

టమోటాలు ఉడికాక పై తొక్కను వలచి ముక్కలు పక్కన పెట్టుకోవాలి .

చింతపండులో తగినన్ని నీరు పోసి ఓ పావుగంట నాన బెట్టుకోవాలి.

తదుపరి మాములుగా పిండి రసం తీసుకొని పక్కన పెట్టుకోవాలి .

ఇప్పుడు మైసూర్ రసం ముద్ద కోసం స్టౌ మీద బాండీ పెట్టి రెండు స్పూన్ల నూను వేసి నూనె బాగా కాగాక ఎండు మిరపకాయలు , ధనియాలు , పచ్చి శనగపప్పు , మిరియాలు వేసి వేగాక ఆవాలు ఇంగువ పచ్చి కొబ్బరి వేసి దింపి పక్కన పెట్టుకుని చల్లారాక మిక్సిలో వేసి తగినంత నీరు పోసి ముద్దగా చేసుకోవాలి.

ముద్ద మెత్త పడగానే ఉడికిన పచ్చి శనగపప్పు , ఉడికిన టమోటాలు కూడా వేసి మెత్తగా మిక్సీ పట్టుకోవాలి.

ఆ తర్వాత ఆ ముద్దను ఒక గిన్నె లోకి తీసుకొని అందులో ముందుగా సిద్ధం చేసుకున్న చింతపండు రసం కలుపుకుని సరిపడా నీళ్ళు చేర్చుకుని అందులో కొద్దిగా పసుపు , తరిగిన పచ్చిమిరపకాయలు , సరిపడా ఉప్పు , కరివేపాకును వేసి బాగా కలిపి స్టౌ మీద పెట్టి బాగా తెర్ల నివ్వాలి.

తర్వాత దింపి కొత్తిమీర వేసి పోపు పెట్టుకోవాలి.

ఆ పోపులో రెండు ఎండు మిరపకాయలు , కొద్దిగా మెంతులు , జీలకర్ర , ఆవాలు , ఇంగువా వేసి పెట్టు కోవాలి.

అంతే ఘమ ఘమ లాడే రుచికరమైన మైసూర్ రసం సిద్ధం.

ఇది రసం కనుక ఇతర ముక్కలు వేసుకోనవసరం లేదు .