లేత మునగాకు తో పప్పు .

లేత మునగాకు తో పప్పు .

ఆలూరి కృష్ణ ప్రసాద్

ఆషాఢ మాసం తప్పనిసరిగా మునగాకు ఒక్కసారైనా తినాలని పెద్దలు అంటారు .

కారణం మునగాకు లో కడుపు లోని క్రిముల్ని నశింప చేసే శక్తి ఉందని చెప్తారు .

కాని లేత మునగాకు దొరికినప్పుడు దానితో పప్ఫు చేసుకుంటే చాలా రుచిగా ఉంటుంది .

కావలసినవి.

లేత మునగాకు -- షుమారు 200 గ్రా .

కందిపప్పు -- ఒక గ్లాసు

చింతపండు - పెద్ద ఉసిరికాయంత

పచ్చిమిర్చి - 5

కరివేపాకు -- రెండు రెమ్మలు.

పసుపు - కొద్దిగా 

ఉప్పు -- తగినంత .

కారం --- స్పూను

పోపుకు .

ఎండుమిర్చి -- 3

మినపప్పు -- స్పూను

మెంతులు -- పావు స్పూను 

జీలకర్ర -- పావు స్పూను 

ఆవాలు -- పావు స్పూను

ఇంగువ -- తగినంత

ముందుగా చింతపండు విడదీసి తడిపి ఉంచుకోవాలి .

మునగాకు వలిచి శుభ్రంచేసుకుని ఒకసారి కడిగి తరుక్కోవాలి .

లేత చిన్న కాడలు వేసుకోవచ్చు .

పచ్చిమిర్చి నిలువుగా తరుక్కోవాలి .

ఇప్పుడు కందిపప్పు కడిగి తగినన్ని నీళ్ళు పోసి స్టౌ మీద ఉడకనివ్వాలి .

పప్పు మూడు వంతులు ఉడకగానే మునగాకు , పచ్చిమిర్చి , చింతపండు , కరివేపాకు , పసుపు , స్పూను కారం వేసి పూర్తిగా ఉడకనివ్వాలి

ఆ తర్వాత తగినంత ఉప్పు వేసి గరిటతో బాగా కలుపుకొని దింపు కోవాలి .

తర్వాత పోపు గరిట లో నూనె వేసి ఎండుమిర్చి , మినపప్పు , మెంతులు , జీలకర్ర , ఆవాలు , ఇంగువ వేసుకుని పోపు పెట్టుకోవాలి .

అంతే లేత మునగాకు తో పప్పు సర్వింగ్ కు సిద్ధం.