మాగాయ పెరుగుపచ్చడి
ఆలూరి కృష్ణ ప్రసాద్
ఇడ్లీలలోకి మాగాయ పెరుగుపచ్చడి చేసుకునే విధానము .
ముందుగా మూడు చెంచాలు మాగాయ పచ్చడి ఒక గిన్నెలోకి తీసుకోండి.
అందులో రెండు గరిటలు పెరుగు వేసుకోండి.
చేతితో బాగా కలిసేలా కలపండి.
మూడు పచ్చి మిర్చి మరియు పెరుగు కలిపిన మాగాయ పచ్చడి మిక్సీలో మెత్తగా గ్రైండ్ చేసుకోండి.
ఇప్పుడు కొంచెము రుచి చూడండి.
ఉప్పు సరిపోతుంది . వేయక్కరలేదు .
ఒకవేళ ఉప్పు సరిపోకపోతే కొద్దిగా కలుపుకోండి.
ఇడ్లీలలోకి కాబట్టి పచ్చడి కొంచెము పల్చగా ఉంటే బాగుంటుంది.
ఇప్పుడు స్టౌ మీద బాండీ పెట్టి మూడు స్పూన్లు నెయ్యి వేసి రెండు ఎండు మిర్చి , మినపప్పు ,
ఆవాలు , ఇంగువ , రెండు కరివేపాకు రెబ్బలు వేసి పోపు పెట్టుకోండి.
అంతే .
నోరూరించే మాగాయ పెరుగు పచ్చడి వేడి వేడి ఇడ్లీల లోకి సిద్ధం.
ఇంక దోశెలలోకి మాగాయ ఉల్లిపాయ పెరుగు పచ్చడి.
****************************
తయారుచేయు విధానము .
ఒక గిన్నెలో నాలుగు స్పూన్లు మాగాయ పచ్చడి తీసుకోండి .
స్టౌ మీద గిన్నెలో నీళ్ళు పెట్టుకొని ఆ నీళ్ళు బాగా మరగనిచ్చి , గిన్నెలో తీసుకున్న మాగాయలో కొద్దిగా వేడి నీళ్ళు పోసుకుని , చేయి కాలుతుంది కాబట్టి గరిటతో కలుపుకోండి.
దోశెలలోకి కాబట్టి మరీ పల్చగా అక్కరలేదు .గట్టిగానే కలపండి.
వేడి నీళ్ళు పోస్తే పచ్చడి రెండు మూడు రోజులు నిల్వ ఉంటుంది.
ఇప్పుడు మూడు పెద్ద ఉల్లిపాయలు మరీ సన్నగా కాకుండా ముక్కలు తరుగుకోండి .
అయిదు పచ్చి మిరపకాయలు కూడా ముక్కలుగా తరుగుకోండి.
ఇప్పుడు మిక్సీలో పచ్చిమిర్చి మాగాయ పచ్చడి రెండు గరిటల పెరుగు వేసి మెత్తగా గ్రైండ్ చేసుకొని గిన్నెలోకి తీసుకోండి .
ఇప్పుడు స్టౌ మీద బాండీ పెట్టి మూడు స్పూన్లు నూనె గాని నెయ్యి గాని వేసుకుని మూడు ఎండు మిర్చి , శనగపప్పు , మినపప్పు , ఆవాలు , ఇంగువ , కరివేపాకు వేసి పోపు పెట్టుకుని అందులో ఉల్లిపాయ ముక్కలు వేసి మగ్గ నివ్వండి .
తర్వాత ఈ ఉల్లిపాయలు కలిపిన పోపును మిక్సీ వేసుకున్న మాగాయ పచ్చడిలో కలుపుకోండి.
ఉప్పు తగ్గితే కొంచెం కలుపుకోండి.
అంతే ఉల్లిపాయ మాగాయ పెరుగు పచ్చడి అన్నం లోకి మరియు దోశెల లోకి సిద్ధం.
Photo A .G . K . blog.
0 comments:
Post a Comment