దోసకాయ బజ్జీ ( కాల్చి చేసుకునే పచ్చడి )

దోసకాయ బజ్జీ ( కాల్చి చేసుకునే పచ్చడి )

 ఆలూరి కృష్ణ ప్రసాద్ 

రోటి సౌకర్యము లేని వారు మిక్సీలో చేసుకోవచ్చు .

రాధా సుసర్ల గారు తయారీ విధానము తెలుపలేదు .

తయారీ విధానము నేను తెలియ చేస్తున్నాను.

ముందుగా పచ్చని గట్టి దోసకాయను తీసుకొని కాయ అంతా నూనె రాసి స్టౌ సిమ్ లో పెట్టుకొని నాలుగు వైపులా కాల్చుకుని తడి చేయి చేసుకుని కాలిన పై చెక్కు అంతా తీసుకొని , కాయను చిదిపి పైన కొద్దిగా 

పసుపు వేసి పక్కన ఉంచుకోవాలి.

చింతపండు ఉసిరికాయంత పరిమాణంలో తీసుకొని తడిపి ఉంచుకోవాలి .

స్టౌ మీద బాండీ పెట్టి మూడు స్పూన్లు నూనె వేసి నాలుగు ఎండుమిరపకాయలు , స్పూనున్నర మినపప్పు , కొద్దిగా మెంతులు , కొద్దిగా జీలకర్ర , అర స్పూను ఆవాలు , కొద్దిగా ఇంగువ మరియు రెండు రెమ్మలు కరివేపాకు వేసి పోపు వేయించు కోవాలి.

ఇప్పుడు మిక్సీలో ముందు ఎండుమిరపకాయలు ఉప్పు , కొద్దిగా తడిపి ఉంచుకున్న చింతపండు వేసి మెత్తగా వేసుకోవాలి .

తర్వాత నాలుగు పచ్చి మిరపకాయలు కూడా వేసుకొని మిక్సీ వేసుకోవాలి .

తదుపరి కాల్చి చిదిపి పక్కన పెట్టుకున్న దోసకాయ వేసి మరీ మెత్తగా కాకుండా ఫోటోలో చూపిన విధంగా ముక్కలు తగిలే విధంగా మిక్సీ వేసుకుని , మిగిలిన పోపు , సన్నగా తరిగిన కొత్తిమీర వేసుకొని ఒకసారి మిక్సీ వేసుకుని వేరే గిన్నెలో కి తీసుకోవాలి .

అంతే ఎంతో రుచిగా ఉండే దోసకాయ కాల్చిన పచ్చడి సర్వింగ్ కు సిద్ధం .