ఉల్లిపాయ పులుసు

ఆలూరుకృష్ణప్రసాదు .

ఉల్లిపాయ  పులుసు.

ఉల్లిపాయలు  --  పావు కిలో లేదా 4
చింతపండు  --  30 గ్రాములు. లేదా  నిమ్మకాయంత.
బెల్లం  --  30 గ్రాములు .
పచ్చిమిర్చి  --  4 
కరివేపాకు  --  మూడు రెమ్మలు
పసుపు   --  కొద్దిగా
ఉప్పు  --  తగినంత
కొత్తిమీర  --  కొద్దిగా
బియ్యపు పిండి  --  స్పూను

పోపుకు .

ఎండుమిరపకాయలు  -  4 
ముక్కలుగా  చేసుకోవాలి .
నూనె  --  మూడు స్పూన్లు
మెంతులు  --  పావు స్పూను
జీలకర్ర  --  పావు స్పూను
ఆవాలు --  అర  స్పూను
ఇంగువ  --  కొద్దిగా

తయారి విధానము .

ముందుగా  స్టౌ మీద  గ్లాసున్నర నీళ్ళు పోసి నీళ్ళు మరిగాక చింతపండు  వేసి  దింపి  చల్లారాక  చిక్కగా  రసం తీసుకోవాలి .

ఉల్లిపాయలు కాస్త  పెద్ద ముక్కలుగా  తరుగు కోవాలి .

పచ్చిమిర్చి  నిలువుగా  తరుగుకోవాలి .

ఇప్పుడు  స్టౌ  మీద  బాండీ  పెట్టి  మొత్తము  నూనె వేసి  నూనె బాగా కాగగానే  వరుసగా  ఎండుమిర్చి  ముక్కలు , మెంతులు , జీలకర్ర , ఆవాలు , ఇంగువ , కరివేపాకు  వేసి పోపు వేగాక  తరిగిన  ఉల్లిపాయల  ముక్కలు, పచ్చిమిర్చి  ముక్కలు  కూడా  వేసి మూతపెట్టి  ముక్కలను   బాగా మగ్గనివ్వాలి .

ముక్కలు  మగ్గగానే  రెడీగా  ఉంచుకున్న  చింతపండు  రసం, పసుపు , ఉప్పు , బెల్లం  కూడా  వేసి  పదిహేను నిముషాల సేపు  బాగా  తెర్లనివ్వాలి .

తర్వాత అర గ్లాసు నీళ్ళలో  స్పూను  బియ్యపు  పిండి  వేసి  స్పూనుతో  బాగా కలిపి  మరుగుతున్న పులుసు లో పోసి మరో అయిదు నిముషాలు  ఉంచి  దింపుకుని  పైన కొత్తిమీర  వేసుకోవాలి .

అంతే  ఘమ ఘమ లాడే  ఉల్లిపాయ  పులుసు  సర్వింగ్  కు  సిద్ధం.