వెరైటీగా వంకాయ కూర

ఈ రోజు  రొటీన్  టైపులో  వంకాయ కూర  చెయ్యకుండా  కొంచెం  వెరైటీగా  చేసాను .

కూర మాత్రం  సూపర్ గా  వచ్చింది .

నేను  పావు కిలో  వంకాయల కూరకు  కొలతలు  ఇస్తున్నాను .

మీరు  అర కిలో  కాయలు  చేసుకునేటట్లయితే  దినుసులు  రెట్టింపు  వేసుకోండి .

వంకాయ  కొబ్బరి  కూర .

కావలసినవి  .

సన్నని నీలం రంగు పొడుగు  వంకాయలు  --  పావు కిలో .

వంకాయలు  శుభ్రంగా  కడుగుకొని  ఒక గిన్నెలో  రెండు గ్లాసులు  నీళ్ళు పోసి  అర స్పూను  ఉప్పు వేసి ,  అందులో  వంకాయలు  నిలువుగా  ముక్కలు   తరుగుకోవాలి .

పచ్చి  కొబ్బరి  --  అర  చిప్ప .
చిన్న ముక్కలుగా  కట్ చేసుకోవాలి .

పచ్చిమిరపకాయలు  --  8

అల్లం ---  15  గ్రాములు .
పై చెక్కు  తీసుకొని  చిన్న ముక్కలుగా కట్  చేసుకోవాలి .

పసుపు  --  కొద్దిగా

ఉప్పు  ---  తగినంత

పోపుకు  --

నూనె   ---  అయిదు  స్పూన్లు
ఎండుమిరపకాయలు  --- 4 
శనగపప్పు  ---  స్పూనున్నర
మినపప్పు  --  స్పూను
జీలకర్ర  --  పావు స్పూను
ఆవాలు  --  అర  స్పూను
కరివేపాకు  ---  మూడు రెమ్మలు.

తయారీ విధానము .

ముందుగా  పచ్చి కొబ్బరి ముక్కలు , పచ్చిమిర్చి ,  అల్లం  ముక్కలు  మరియు  కొద్దిగా  ఉప్పు వేసి మిక్సీ లో  కచ్చాపచ్చాగా  వేసుకోవాలి .

ఇప్పుడు  స్టౌ  మీద  బాండీ  పెట్టి  అయిదు స్పూన్లు  నూనె వేసి , నూనె  బాగా కాగగానే  వరుసగా ఎండుమిర్చి  ముక్కలు , శనగపప్పు , మినపప్పు , జీలకర్ర . ఆవాలు మరియు కరివేపాకు  వేసి  పోపు  వేయించుకొని  పోపు వేగగానే  అందులో  నీళ్ళలో  తరిగిన  వంకాయ ముక్కలు  , కొద్దిగా పసుపు, కొద్దిగా  ఉప్పు వేసి మూతపెట్టి  మెత్తగా  మగ్గ నివ్వాలి .

తరువాత  పచ్చి కొబ్బరి  మిశ్రమము  కూడా  వేసి , ఒక అయిదు  నిముషాలు  పచ్చి  వాసన పోయేవరకు  ఉంచి  దింపుకోవాలి .

అంతే  ఎంతో  రుచిగా  ఉండే  వంకాయ  కొబ్బరి  కూర  భోజనము  లోకి  సిద్ధం.