దోసకాయ, బీరకాయ పచ్చడి

ఆలూరుకృష్ణప్రసాదు .

దోసకాయ మరియు బీరకాయ పచ్చడి .

కావలసినవి.

పసుపు పచ్చగా  గట్టిగా  ఉన్న దోసకాయ -- 1 
లేత బీరకాయలు --  రెండు.
పచ్చిమిరపకాయలు  -- 8 
చింతపండు  --  చిన్న నిమ్మకాయంత .
కొత్తిమీర   --  ఒక చిన్న కట్ట
పసుపు  --  కొద్దిగా
ఉప్పు  --  తగినంత

పోపునకు .

నూనె --  ఐదు  స్పూన్లు
ఎండుమిరపకాయలు  --  8
మినపప్పు  --  స్పూనున్నర
మెంతులు --  పావు స్పూను
ఆవాలు --  అరస్పూను
జీలకర్ర  --  పావు స్పూను
ఇంగువ  --  కొద్దిగా
కరివేపాకు  --  మూడు రెమ్మలు

తయారుచేయు  విధానము .

పదినిముషాల ముందు చింతపండు  విడదీసి కొద్దిగా  నీళ్ళలో  తడిపి ఉంచుకోవాలి .

బీరకాయలు పై చెక్కు  తీసుకుని  ముక్కలుగా తరిగి  ఉంచుకోవాలి .

దోసకాయ పైన నూనె రాసి  స్టౌ వెలిగించి  సిమ్ లో సెగను పెట్టి  కాయను అన్ని వైపులా కాల్చు కోవాలి .

చల్లారగానే  తడి చేతితో  పై తొక్కను  వలుచుకొని  కాయను విడదీసి ఒక పళ్ళెంలో విడిగా  పెట్టుకోవాలి .

మరల స్టౌ  వెలిగించి బాండీ పెట్టి  రెండు స్పూన్లు  నూనె  వేసి  నూనె బాగా కాగగానే  బీరకాయ ముక్కలు, కొద్దిగా  పసుపు , కొద్దిగా  ఉప్పు  మరియు పచ్చిమిరపకాయలు  కాయలు వేసి  మూతపెట్టి  బీరకాయలను  బాగా  మగ్గనివ్వాలి .

తరువాత వాటిని  వేరే ప్లేటులో  తీసుకోవాలి .

మరల స్టౌ వెలిగించి బాండి పెట్టి  మూడు స్పూన్లు  నూనె వేసి నూనె బాగా కాగగానే  వరుసగా  ఎండుమిరపకాయలు , మెంతులు , మినపప్పు , జీలకర్ర , ఆవాలు , ఇంగువ మరియు కరివేపాకు  వేసి పోపు పెట్టుకోవాలి .

పోపు చల్లారగానే  ముందుగా  మిక్సీ లో  ఎండుమిరపకాయలు , తడిపిన చింతపండు , పచ్చిమిరపకాయలు , మరియు తగినంత  ఉప్పు వేసి  మెత్తగా  వేసుకోవాలి .

తర్వాత  బీరకాయముక్కలు , కాల్చిన దోసకాయ , మిగిలిన  పోపు  మరియు కొత్తిమీర  వేసి  పచ్చడి మెత్తగా  వేసుకోవాలి .

తర్వాత వేరే గిన్నెలోకి తీసుకుని  పైన పోపు పెట్టుకోవాలి .

అంతే . ఎంతో రుచిగా  ఉండే  దోసకాయ బీరకాయ పచ్చడి దోశెలు , గారెలు మరియు భోజనము లోకి సర్వింగ్  కు సిద్ధం .