బీరకాయ, అరటికాయ బజ్జీలు

బీరకాయ మరియు అరటి కాయ బజ్జీలు.

తయారీ విధానము .

ఒక బీరకాయ  మరియు ఒక అరటికాయ పై చెక్కు  తీసుకుని  చక్రాలుగా తరుగు కోవాలి.

ఒక  100  గ్రాములు శనగపిండిలో ,  స్పూనున్నర   బియ్యపు పిండి, చిటికెడు  వంటసోడా , అర స్పూను  కారం, సరిపడా ఉప్పు వేసుకుని  సరిపడా నీళ్ళు పోసుకుని  చేతితో బాగా కలుపు కోవాలి .

తర్వాత  స్టౌ మీద బాండీ పెట్టుకుని  పావు కిలో  నూనె పోసుకుని  నూనె బాగా కాగాక  ఒక్కొక్క  ముక్కను పిండిలో ముంచి ఏడెనిమిది చొప్పున వేసి బంగారు రంగులో వేయించుకోవాలి .

అంతే మధ్యాహ్నం  అల్పాహారము  బీరకాయ మరియు అరటి కాయ బజ్జీలు  సేవించడానికి సిద్ధం.

మా చిన్నప్పుడు  బాపట్లలో   జగన్నాథం అనే వ్యక్తి  ఒక స్టాండు మీద  అన్ని వస్తువులు పోస్టాఫీసు  ఎదురుగా  4 గంటల కల్లా పెట్టుకుని  రాత్రి 10 గంటల ద్వారా జోరుగా  వ్యాపారం  చేసేవాడు.

మిరపకాయబజ్జీలు , బీరకాయ అరటి కాయ బజ్జీలు , చేగోడీలు, గరం గరం ( ముంత కింద పప్పు )  ఇలా అన్ని రకములు  వేడిగా  అమ్మేవాడు.

వేడిగా  అంటే  చిల్లుల ముంతలో  బొగ్గులు ( నిప్పులు )  పోసుకుని వేయించిన  అటుకుల మీద పెట్టుకొని  తన వెంట తీసుకుని  వచ్చేవాడు.

ఆలా వేడి వేడిగా  ఇచ్చే వాడు .

ఇంక బీరకాయ అరటి కాయ బజ్జీలలో అయితే  పెద్ద ఉల్లిపాయలు సన్నగా  తరిగి  బజ్జీలలో పెట్టి , పండు మిరపకాయల పచ్చడి  మెత్తగా  రుబ్బి అందులో  నిమ్మరసం పిండి  ఆ పచ్చడి  ఉల్లిపాయలు కూరిన బజ్జీలలో పెట్టి ఇచ్చేవాడు.

అలా తింటే దాని రుచి చెప్పనలవి కాదు .

మీరు  ఒకసారి ప్రయత్నించ వలసిందే.

అశోకా హల్వా

ఆలూరుకృష్ణప్రసాదు .

అశోకా హల్వా.

కావలసినవి .

చాయ పెసరపప్పు -- ఒక కప్పు
గోధుమ పిండి --  రెండు స్పూన్లు
యాలకులు  -- 5 మెత్తగా  పొడి చేసుకోవాలి.
పంచదార --  ఒక కప్పున్నర
నెయ్యి  --  ఒక కప్పు
జీడిపప్పు  --  15  పలుకులు .

తయారీ  విధానము .

స్టౌ వెలిగించి  బాండీ  పెట్టి  కప్పు పెసరపప్పు వేసి పెసరపప్పు  కమ్మని వాసన వచ్చే దాకా వేయించు కోవాలి .

తర్వాత కుక్కర్లో  గిన్నె పెట్టి  వేయించిన  పప్పు వేసి  సరిపడా  నీళ్ళు పోసి  మూడు విజిల్స్  వచ్చే వరకు  ఉంచాలి .

తర్వాత  మెత్తగా  పప్పును యెనపాలి .

తర్వాత బాండీ పెట్టి  రెండు స్పూన్లు  నెయ్యి వేసి  ముందుగా  జీడిపప్పు  వేయించుకుని  విడిగా  ప్లేటులో తీసుకుని  ఉంచుకోవాలి .

తర్వాత  అదే బాండీలో  మరో స్పూను  నెయ్యి వేసి  గోధుమ పిండి కమ్మని వాసన వచ్చే వరకు  వేయించుకుని పక్కన  పెట్టు కోవాలి .

తర్వాత అదే బాండీలో
మళ్ళీ నాలుగు స్పూన్లు  నెయ్యి వేసి ఉడికించి ఉంచుకున్న  పెసర పప్పు  మరియు పంచదార వేసి గరిటతో బాగా కలుపుతూ ఉండాలి.

రెండూ దగ్గర  పడి  ఉడుకుతుండగానే  పది నిముషాల  తర్వాత  వేయించిన  గోధుమ పిండి , యాలకుల పొడి వేసి బాగా కలుపుకొని    మిఠాయి రంగు కొద్దిగా  పాలల్లో  కలుపుకుని   ఉడుకుతున్న హల్వాలో  పోసి గరిటతో  బాగా కలుపుకోవాలి .

తర్వాత  మిగిలిన  నెయ్యి  , జీడిపప్పు పలుకులు  వేసి  గరిటతో  బాగా కలుపుకోవాలి .

అంతే ఎంతో రుచిగా  ఉండే  తమిళనాడు  స్పెషల్ అశోకా హల్వా  సర్వింగ్  కు సిద్ధం.

టమోటో , బెండకాయలు మరియు మునగ కాడలు వేసి కందిపప్పుతో పప్పు చారు .

ఆలూరుకృష్ణప్రసాదు .

టమోటో ,   బెండకాయలు మరియు మునగ కాడలు వేసి కందిపప్పుతో పప్పు  చారు .

తయారీ విధానము.

ఒక   కప్పు  కందిపప్పు   ఒకసారి  కడిగి  కుక్కర్  లో  సరిపడా  నీళ్ళు పోసి మూడు  విజిల్స్  వచ్చే వరకు   ఉంచి  స్టౌ  ఆపేయాలి .

తర్వాత  కుక్కర్  తీసి  పప్పు బాగా యెనిపి , అందులో  నాలుగు  పచ్చిమిర్చి  ముక్కలుగా తరిగి , రెండు  ములక్కాడలు  ముక్కలుగా  తరిగి ,  రెండు టమోటో లు ముక్కలు గా తరిగి , ఆరు బెండకాయలు ముక్కలుగా తరిగి , నిమ్మకాయంత  చింతపండు  రసం  గ్లాసు నీళ్ళలో   పది  నిముషాలు నానబెట్టి  రసం తీసుకుని  ,  కాస్త పసుపు, రెండు రెమ్మలు  కరివేపాకు  , సరిపడా  ఉప్పు వేసి  మరో గ్లాసు నీళ్ళు పోసి  స్టౌ మీద  పెట్టి   ములక్కాడలు  ఉడికే  వరకు పుప్పు చారు   మరగనివ్వాలి .

ఆ తర్వాత   పప్పు చారు  దింపాలి .

తర్వాత  స్టౌ మీద  బాండీ  పెట్టి  రెండు  స్పూన్లు   నూనె  వేసి , నూనె  బాగా కాగగానే   వరుసగా  మూడు ఎండుమిరపకాయలు  ముక్కలుగా  చేసి , కొద్దిగా  మెంతులు , పావు స్పూను  జీలకర్ర  ,  అర స్పూను  ఆవాలు  ,  కొద్దిగా  ఇంగువ మరియు  కొద్దిగా  కరివేపాకు   వేసి  పోపు  పెట్టుకోవాలి .

ఆ తర్వాత  కొత్తిమీర   తరిగి   పైన  వేసుకోవాలి .

అంతే  ఘమ  ఘమ లాడే  ములక్కాడ  ,  బెండకాయ , టమోటో  కందిపప్పుతో  పప్పు చారు  సర్వింగ్  కు  సిద్ధం.

ఇష్టమైన వారు చిన్న బెల్లం  ముక్క వేసుకోవచ్చు .

వెల్లుల్లి  ఇష్టపడే వారు  ఇంగువ బదులుగా ఎనిమిది వెల్లుల్లి  రేకలు వేసుకుని  పోపు వేసుకోవచ్చును.