పెసర అప్పడాల పిండి

పెసర అప్పడాల పిండి తయారీ విధానము .

ఆలూరి కృష్ణ ప్రసాద్

రెండు గ్లాసుల పెసర పప్పు , పావు గ్లాసు శనగపప్పు రెండూ కలిపి మెత్తగా మిల్లులో మర పట్టించాలి .

మిక్సీ లో వేసుకుంటే పిండి బరకగా ఉంటుంది .

మెత్తగా రాదు .

ఒక పళ్ళెం లో గాని లేదా ఒక బేసిన్ లో ఈ పిండిని వేసుకోవాలి .

పావు స్పూను లో సగం పొడి చేసిన ఇంగువ , తగినంత ఉప్పు కొద్ది నీళ్ళల్లో వేసి స్పూను తో బాగా కలిపి సిద్ధం చేసుకోవాలి .

అప్పడాల పిండికి వాడే సీమ మిరపకాయలు దొరుకుతాయి .

ఆ మిరపకాయలు మరియు కాస్త పెసర పిండి మిక్సీ లో వేసుకుని 

బాగా మెత్తగా గ్రైండ్ చేసుకోవాలి .

ఈ గ్రైండ్ చేసిన పొడిని బేసిన్ ఉన్న మిశ్రమంతో కలిపి, గ్లాసులో కలిపి ఉంచుకున్న ఇంగువ నీళ్ళు కూడా పోసి ,అవసరమయితే కొద్ది కొద్దిగా నీళ్ళు పోసుకుంటూ పిండిని గట్టిగా కలుపుకోవాలి .

తర్వాత రోలు మరియు పచ్చడి బండ శుభ్రంగా తుడుచుకొని , 

వేరు శనగ నూనె దంపే రోలు లోపలి భాగం లో రాసి , ఈ ముద్దను అందులో వేసి బాగా ముద్ద అంతా కలిసి అప్పడాలు వత్తడానికి మృదువుగా ఉండే విధంగా దంచుకోవాలి .

మర్దనా చేయడం పూర్తి అయిన తర్వాత చేతికి నూనె రాసుకొని చిన్న చిన్న ఉండలుగా చేసుకోవాలి .

మొత్తము పిండి ఒక్కసారి కలుపుకోనవసరం లేదు.

నీళ్ళు కలపకముందే పిండిని ఒక సీసాలో భద్రపరుచుకొని అవసరాన్ని బట్టి కొద్ది కొద్దిగా పిండి కలుపు కొనవచ్చును .

వేడి వేడి అన్నంలో నెయ్యి వేసుకొని ఈ అప్పడాల పిండి నంచుకుని తింటుంటే , ఆ రుచి అద్భుతంగా ఉంటుంది .