చామదుంపలు ఉప్మా పోపు కూర.

చామదుంపలు ఉప్మా పోపు కూర.

 ఆలూరి కృష్ణ ప్రసాద్ 

కావలసినవి .

చామదుంపలు --- అర కిలో

గుండ్రంగా చిన్న దుంపలు అయి ఉండాలి .

పచ్చి మిరపకాయలు --- 8 

 చింతపండు --- 30 గ్రాములు 

కరివేపాకు --- మూడు రెమ్మలు

ఎండు కారం --- స్పూను 

ఉప్పు --- తగినంత 

పసుపు --- కొద్దిగా .

పోపుకు .

నూనె --- 50 గ్రాములు.

ఎండుమిర్చి -- 4

మినపప్పు --- స్పూనున్నర 

శనగపప్పు --- రెండు స్పూన్లు 

జీలకర్ర -- పావు స్పూను 

ఆవాలు -- అర స్పూను 

ఇంగువ --- తగినంత

తయారీ విధానము .

ముందుగా చింతపండు విడదీసి పదిహేను నిముషముల ముందు నీళ్ళల్లో నాన బెట్టి , చిక్కగా రసం తీసుకొని విడిగా ఉంచుకోవాలి .

చామదుంపలు ఇసుక లేకుండా శుభ్రంగా కడిగి , కుక్కర్ లో వేసి , తగినన్ని నీళ్ళు పోసి మూడు విజిల్స్ రానిచ్చి స్టౌ ఆపుకోవాలి .

తర్వాత చామ దుంపల పై తొక్కు వలుచుకోవాలి . దుంపలు మరీ పెద్దవిగా ఉంటే కాస్త పెద్ద ముక్కలుగా చాకుతో కట్ చేసుకుని ఒక పళ్ళెంలో విడిగా పెట్టుకుని దుంపల పైన కొద్దిగా పసుపు వేసుకోవాలి .

ఇప్పుడు స్టౌ మీద బాండీ పెట్టి నూనె మొత్తం వేసి , నూనె కాగగానే వరుసగా ఎండుమిర్చి ముక్కలు , పచ్చి శనగపప్పు , మినపప్పు , జీలకర్ర , ఆవాలు , ఇంగువ , పచ్చిమిర్చి ముక్కలు , కరివేపాకు వేసి పోపు వేగగానే ఉడికిన చామదుంపలు పోపులో వేసి వెంటనే విడిగా తీసి ఉంచుకున్న చింతపండు రసం , సరిపడా ఉప్పు వేసి మూత పెట్టి పులుపు , ఉప్పు మరియు కారం 

 దుంపలకు పట్టే విధంగా మగ్గ నివ్వాలి .

మధ్య మధ్య లో కూరను కదుపు తుండాలి .

దింపబోయే మూడు నిముషాల ముందు కూరలో పచ్చి మిర్చి కారం సరిపోని యెడల ఒక స్పూను ఎండు కారం వేసుకోవాలి .

తర్వాత కూర విడిగా ప్లేటు లోకి తీసుకోవాలి .

అంతే ఘమ ఘమ లాడే చామ దుంపల ఉప్మా పోపు కూర సర్వింగ్ కు సిద్ధం.

ఇదే కూరలో చింతపండు రసానికి బదులుగా ఒక కాయ నిమ్మరసం స్టౌ ఆపాక పిండు కోవచ్చు .

స్టౌ వెలుగుతున్నప్పుడు పిండితే కూర చేదు వస్తుంది .

ఫోటో ఉమా హోమ్ టిప్స్ గూగుల్ సౌజన్యంతో