తోటకూర ఆవ పెట్టిన పులుసు కూర.
ఆలూరు కృష్ణప్రసాదు .
తయారీ విధానము .
ముందుగా ఒక కట్ట తోటకూర ను శుభ్రం గా కడిగి అడుగు వేర్లు మరియు ముదురు కాడలు తీసేసి లేత కాడలు ఉంచి సన్నగా తరుగుకోవాలి .
ఆ తర్వాత పావు కప్పు చాయపెసరపప్పు , మరియు తరిగిన తోటకూర ఒక గిన్నెలో అర గ్లాసు నీళ్ళు పోసి , స్టౌ మీద పెట్టి పెసర పప్పు మూడు వంతులు ఉడికే వరకు ఉంచి దింపేయాలి .
దానిని వడకట్టుకుని ఆ నీళ్ళు పారబోయకుండా వేరే ఉంచి ముద్ద విడిగా వేరే ప్లేటు లోకి తిసుకోవాలి .
నిమ్మకాయంత చింతపండు అరగ్లాసు నీళ్ళలో పది నిముషాలు నానబెట్టి పల్చగా రసం తీసుకొని ఉంచుకోవాలి
ఇప్పుడు ఆవ పెట్టుకోవడానికి సిద్ధం చేసుకోవాలి .
మిక్సీ లో అర స్పూను ఆవాలు , మూడు పచ్చిమిర్చి , ఎండుమిరపకాయలు రెండు , కొద్దిగా ఉప్పు మరియు కొద్దిగా పసుపు వేసి కొంచెం నీళ్ళు పోసి మెత్తగా వేసుకొని , వేరే ప్లేటులో సిద్ధంగా ఉంచుకున్న చల్లారిన ముద్దను వేసి మిక్సీ ఒకసారి తిప్పాలి
.
తోటకూర పెసర పప్పు ముద్ద మరియు ఆవ అన్నీ బాగా కలిసి పోతాయి .
ఇప్పుడు మరలా ఆ ముద్దను గిన్నెలో కి తీసుకొని , వేరేగా ఉంచిన ఉడికిన నీళ్ళు, సిద్ధంగా ఉంచుకున్న అర గ్లాసు చింతపండు రసం , అర స్పూను కారం ,సరిపడా ఉప్పు వేసి మళ్ళీ స్టౌ మీద పెట్టి మరగ నివ్వాలి .
ఇప్పుడు స్టౌ మీద బాండీ పెట్టి మూడు స్పూన్లు నూనె వేసి నూనె బాగా కాగగానే వరుసగా మూడు ఎండుమిరపకాయలు ముక్కలుగా చేసినవి , స్పూను మినపప్పు , అర స్పూను ఆవాలు , పావు స్పూను జీలకర్ర , కొద్దిగా ఇంగువ , మూడు పచ్చిమిర్చి ముక్కలుగా తరిగినవి , రెండు రెమ్మలు కరివేపాకు వేసి పోపు వేగగానే సన్నగా తరిగిన రెండు ఉల్లిపాయల ముక్కలు కూడా వేసి ఉల్లిపాయలు వేగగానే ఈ మొత్తము పోపు మరుగుతున్న పులుసులో వేసి మరో అయిదు నిముషాల పాటు ఉంచి ఉల్లిపాయ ముక్కలు మెత్తగా ఉడకగానే దింపుకోవాలి.
అంతే ఎంతో రుచిగా ఉండే తోటకూర ఆవ పెట్టిన కూర సర్వింగ్ కు సిద్ధం .
కొద్దిగా తయారీ విధానము పెద్దదిగా ఉన్నట్లు అన్పించినా ఈ తోటకూర పులుసు కూర చాలా రుచిగా ఉంటుంది .
ఈ పులుసు కూర అన్నం లోకే కాకుండా పూరీ మరియు చపాతీలలోకి కూడా చాలా బాగుంటుంది .
0 comments:
Post a Comment