బీరకాయ సొరకాయ పచ్చడి

ఈ రోజు పరిచయం  చేస్తున్న  కాంబినేషన్ పచ్చడి.

బీరకాయ మరియు ఆనపకాయ /  సొరకాయ పచ్చడి .

కావలసినవి .

బీరకాయలు  --  రెండు.
సొరకాయ  --  250 గ్రాములు  ముక్క .
పచ్చి మిరపకాయలు  -- 12 .
చింతపండు  -- నిమ్మకాయంత . విడదీసి కొద్ది నీళ్ళలో తడిపి ఉంచుకోవాలి .
కొత్తిమీర  -- ఒక చిన్న కట్ట.
పసుపు  --  కొద్దిగా
ఉప్పు   --  తగినంత
నూనె  --  మూడు స్పూన్లు .

పోపునకు.

నూనె --  రెండు స్పూన్లు
ఎండుమిరపకాయలు  - 5
చాయమినపప్పు -  స్పూనున్నర
జీలకర్ర  - పావు స్పూను
మెంతులు -- పావు స్పూన్  కు తక్కువ .
ఆవాలు -- అర స్పూను
ఇంగువ  --  కొద్దిగా
కరివేపాకు  --  రెండు రెమ్మలు.

తయారీ విధానము .

బీరకాయలు  ఒకసారి బాగా కడుగుకుని  పై చెక్కు  తీసి  కాస్త పెద్ద  ముక్కలుగా తరుగు కోవాలి .

ఇష్టమైన వారు చెక్కుతో సహా తరుగు కోవచ్చు. 

ఆనపకాయ /  సొరకాయ  చెక్కు తీసి కాస్త పెద్ద ముక్కలుగా  తరుగుకోవాలి .

ఇప్పుడు స్టౌ మీద బాండీ పెట్టి  మూడు స్పూన్లు  నూనె వేసి నూనె బాగా కాగగానే  బీరకాయ ముక్కలు , సొరకాయ ముక్కలు , పచ్చి మిరపకాయలు మరియు కొద్దిగా  పసుపు వేసి  మూత పెట్టి  ముక్కలను బాగా మగ్గ నివ్వాలి. 

ఆ తర్వాత అందులోనే  కొత్తిమీర ను  వేసి  మగ్గ నివ్వాలి .

మగ్గినవి  వేరే ప్లేటులోకి  తీసుకోవాలి .

తిరిగి  స్టౌ మీద బాండీ పెట్టి  రెండు స్పూన్లు  నూనె వేసి  నూనె బాగా కాగగానే  వరుసగా  మెంతులు , ఎండుమిరపకాయలు , చాయమినపప్పు , జీలకర్ర , ఆవాలు  , ఇంగువ మరియు కరివేపాకును వేసి పోపు వేయించుకోవాలి .

పోపు చల్లారగానే  ముందుగా  రోటిలో  ఎండుమిరపకాయలు , తడిపిన చింతపండు మరియు ఉప్పు వేసి పచ్చడి బండతో  మెత్తగా  దంపుకోవాలి .

తర్వాత  మగ్గబెట్టిన  బీరకాయ , సొరకాయ మరియు పచ్చిమిర్చి  మిశ్రమము వేసి పచ్చడి బండతో  మెత్తగా  నూరుకోవాలి .

తర్వాత  మిగిలిన  పోపును కూడా వేసి బండతో మరోసారి  బాగా నూరుకుని , వేరే గిన్నెలోకి  తీసుకోవాలి .

అంతే. ఇంగువ మరియు  కొత్తిమీర  ఘమ ఘమలతో  బీరకాయ మరియు ఆనపకాయ  రోటి పచ్చడి దోశెలలోకి, రోటీల లోకి మరియు  భోజనము  లోకి  సర్వింగ్  కు సిద్ధం.

సంబంధించిన  రెసిపీ  మరియు  ఫోటో  నా స్వంతం.