పొట్టు మినపప్పు తో రోటిపచ్చడి.
ఇటీవల కాలంలో మినపగుళ్ళు మరియు చాయమినపప్పు వచ్చాయి కాని పాత కాలంలో వంటల లోకి పోపులలోకి పొట్టు మినపప్పు నే వాడే వారు .
గారెలు వేయడానికి కూడా పొట్టు మినపప్పునే ఉపయోగించేవారు .
మినపసున్ని ఉండలు తయారు చేయడానికి కూడా ఈ పొట్టు మినపప్పు నే ఉపయోగించేవారు .
అలా వేయించి తిరగలిలో విసిరిన మినపసున్ని విసిరేటప్పుడే ఇల్లంతా ఘమ ఘమ లాడి పోయేది .
పొట్టు మినపప్పు ఉపయోగించడం వలన శరీరానికి అవసరమైన ఐరన్ ధాతువు సమకూరుతుంది .
ఇప్పుడు పొట్టు మినపప్పు తో రోటిపచ్చడి ఎలా చేయాలో తెలుసుకుందాం .
కావలసినవి .
పొట్టు మినపప్పు -- 100 గ్రాములు .
ఎండుమిరపకాయలు -- 15
జీలకర్ర -- స్పూనున్నర
చింతపండు -- నిమ్మకాయంత . ( విడదీసి పావు గ్లాసు నీళ్ళలో పావు గంట ముందు తడిపి ఉంచుకోవాలి .)
నెయ్యి లేదా నూనె -- మూడు స్పూన్లు
ఇంగువ -- కొద్దిగా
ఉప్పు -- తగినంత
బెల్లం -- చిన్న ముక్క
( ఇష్టం లేని వారు మానేయవచ్చును )
తయారీ విధానము .
ముందుగా స్టౌ మీద బాండి పెట్టి మూడు స్పూన్లు నెయ్యి వేసి , నెయ్యి బాగా కాగగానే పొట్టు మినపప్పు , ఎండుమిరపకాయలు , జీలకర్ర మరియు ఇంగువ వేసి కమ్మని వాసన వచ్చే వరకు వేయించుకోవాలి .
చల్లారగానే రోటిలో ఈ మిశ్రమము , చింతపండు నీళ్ళతో సహా , తగినంత ఉప్పు మరియు చిన్న బెల్లం ముక్కను వేసి పొత్రముతో కొద్దిగా నీళ్ళు చిలకరిస్తూ మరీ మెత్తగా కాకుండా కొంచెం పప్పులు తగిలే విధముగా రుబ్బుకోవాలి .
తర్వాత వేరే గిన్నెలోకి తీసుకోవాలి .
ఈ పచ్చడి రెండు రోజులు నిల్వ ఉంటుంది .
అంతే ఎంతో రుచిగా ఉండి ఆరోగ్యకరమైన పొట్టు మినపప్పుతో పచ్చడి సర్వింగ్ కు సిద్ధం.
రోటి సౌకర్యము లేని వారు ఇదే పద్ధతిలో మిక్సీ లో చేసుకొనవచ్చును .
0 comments:
Post a Comment