పచ్చి వడియాలు

ఆలూరుకృష్ణప్రసాదు .

దాదాపుగా  మార్చి నెల చివరికి  వచ్చేసాము .

ఎండలు  బాగానే  కాస్తున్నాయి .

వేసవి కాలం వచ్చిందంటే  ప్రతి తెలుగు వారి ఇంట్లోనూ హడావుడిగా  ఉంటుంది .

పెద్దవారికి  చేతి నిండా పనే .

పండు మిరపకాయల పచ్చడి  ( కొరివి కారం / పళ్ళ కారం ),
చింతకాయ పచ్చడి , గోంగూర పచ్చడి , ఉసిరి కాయ పచ్చడి ,
వివిధ రకము లైన మామిడి కాయతో పచ్చళ్ళు , ఆవకాయ , మాగాయ.

ఇలా  రెండు నెలల పాటు  అందరి ఇళ్ళల్లోనూ  ఒకటే  హడావుడిగా  ఉంటుంది .

ఇవి కాక ఈ రెండు నెలలూ  సగ్గు బియ్యం  వడియాలు , బియ్యపు పిండి తో వడియాలు , బియ్యపు రవ్వతో వడియాలు , మినపప్పు తో చిన్న వడియాలు , మినపప్పు  తోనే బూడిద గుమ్మడి కాయతో వడియాలు  ఇలా ఈ వేసవి కాలం రెండూ నెలలు ఎండలను కూడా లక్ష్యపెట్టక మన స్త్రీ మూర్తులందరూ ఎర్రని  ఎండలో ఎంతో కష్ట పడతారు .

ఇప్పుడు  నేను ప్రస్తావించబోయే అంశం బూడిద గుమ్మడి కాయతో పచ్చి వడియాలు .

బూడిద గుమ్మడి కాయతో ఏడాదికి  సరిపడా  వడియాలు పెట్టుకునే సమయంలోనే  ఆ రోజు భోజనము  లోకి ఆదరువుగా  గుమ్మడికాయ  ముక్కలను కలిపిన కొంత పిండిని   విడిగా  తీసుకుని  నూనెలో గారెల మాదిరిగా  వేసుకుంటారు .

మరి  రెసిపీ  ఎలాగో తెలుసుకోండి .

**************************

ఆలూరుకృష్ణప్రసాదు .

గుమ్మడికాయ   పచ్చి వడియాలు .

ఏడాదికి   ఒకసారి   గుమ్మడికాయ  వడియాలు  అందరూ  పెట్టుకుంటారు  కదా !

అలా  వడియాలు  పెట్టుకునేముందు  చాలా  మంది  ఆ రోజుకు  అన్నంలోకి  కొంత ముక్కలు  కలిపిన  పిండి  విడిగా  తీసుకుని  నూనెలో  వడియాలు  వేయించు కుంటారు .

ఆ  వడియాలనే  గుమ్మడికాయ పచ్చి వడియాలు  అని  అంటారు.

గోదావరి  జిల్లాలలో  చాలా  కుటుంబాల వారు  ఈ పచ్చి  వడియాలను  వేసుకుంటారు .

మా  ఇంట్లో  అయితే  చిన్న చిన్న  లేత గుమ్మడికాయలు  ప్రత్యేకంగా  తెచ్చుకొని  మూడు నెలలకు  ఒకసారి  అయినా  అన్నంలోకి  ఈ  పచ్చి  వడియాలు  వేసుకుంటాము.
మా ఇంట్లో  అందరికీ   ఈ  వడియాలు  చాలా  చాలా  ఇష్టం.

ఈ  వడియాలు  వేసుకున్న  రోజున భోజనము   లోకి  వేరే  ఐటమ్స్  ఉండవు  కాంబినేషన్  గా  చారు తప్ప .

గారెల  రూపంలో  వేసుకుంటాము .

ఎంతో  రుచిగా  ఉండే  ఈ  గుమ్మడి  కాయ  పచ్చి వడియాలు

తయారీ  విధానము  మీ  కోసం .

మినపగుళ్ళు  --   250  గ్రాములు

గుమ్మడికాయ
లేత దైనా , లేదా
ముదురు దైనా 
షుమారు     ---   1  K.G  కాయ

పచ్చి  మిరపకాయలు   ---
                           200  గ్రాములు

ఇంగువ ----  మరి  కాస్త  ఎక్కువగా .

పసుపు  ---  తగినంత

ఉప్పు    --   తగినంత

నూనె   ---   350  గ్రాములు

తయారీ  విధానము  ---

రేపు  ఉదయము  భోజనాల లోకి  పచ్చి  వడియాలు  వేసుకుందామనుకుంటే  ముందు  రోజు గుమ్మడి  కాయను  పగుల కొట్టి  పై చెక్కు తీయకుండా సొరకాయ  ముక్కలు  తరిగి నట్లుగా  తరుగుకొని  ముక్కలకు  ఉప్పు  , పసుపు  వేసి  ఒక  గుడ్డలో  మూట కట్టి  అందులో  నీళ్ళు  కారి పోయే  విధంగా  పైన  చిన్న  రోలు  కాని , లేదా  బరువు  కానీ  పెట్టుకోవాలి .

మురుసటి  రోజు  ఉదయానికల్లా  నీరు కారిపోతుంది.

మరుసటి రోజు  పిండిలో  ముక్కలనువేయబోయే ముందు
ఒకసారి  ముక్కలను  చేతితో  పిండుకోవాలి.

లేదా  పిండి  పలుచన  అయి  గారెలు  వేయడానికి   రావు .

మినపగుళ్ళు  కూడా  ముందు  రోజు  నాన బోసుకోవాలి  .

మరుసటి  రోజు  నానిన  పప్పు  శుభ్రంగా  కడిగి  మిక్సీ  లేదా  గ్రైండర్లో  పప్పు  ,  తగినంత  ఉప్పు  వేసి  కొద్దిగా   నీళ్ళు  పోస్తూ  గారెల  పిండిలా  గట్టిగా  రుబ్బు కోవాలి .

ఇప్పుడు  చాలా    కొంచెం   నీళ్ళల్లో  ఇంగువ  వేసి  బాగా  కలిపి  ఆ నీళ్ళు  గట్టి పిండిలో  వేయాలి .

ఇప్పుడు  గట్టిగా  పిండిన  గుమ్మడికాయ   ముక్కలు  అందులో వేసి  రెండు సార్లు  తిప్పితే  చాలు  .

పిండి  ముక్కలకు  పడుతుంది . ఇంగువ  వాసనతో.

ముక్కలు  కలిపిన  తర్వాత  కూడా  పిండి  గారెల  పిండిలా  గట్టిగానే  ఉండాలి .

పచ్చి మిరపకాయలు   తొడిమలు  తీసుకొని   ముక్కలుగా  కట్  చేసుకొని   మిక్సీలో  వేసుకోవాలి .

పిండిలో  ఉప్పు  తగ్గినట్లు  అన్పిస్తే
ఈ  పచ్చి మిర్చి  లో  వేసుకుని కలుపుకోండి .

ఇప్పుడు  ముక్కలు  కలిపిన  పిండిని  ఒక  గిన్నెలోకి  తీసుకుని
అందులో  మిక్సీలో  వేసిన  పచ్చి  మిరపకాయల  మిశ్రమం  కలుపు కోవాలి .

భోజనానికి   ముందు 

స్టౌ  మీద  బాండి  పెట్టి మొత్తము  నూనె  పోసి  నూనె  బాగా  కాగిన  తర్వాత  గారెల  మాదిరిగా  వేసుకోవాలి.

ఘమ  ఘమ  లాడే  ఇంగువ  వాసన తో  పచ్చి గుమ్మడికాయ   వడియాలు  (  గారెలు  )  భోజనము   లోకి  సిద్ధం .

హామీ పత్రం.

సంబంధిత  రెసిపీ  మరియు ఫోటో  నా స్వంతం .