ఆలూరుకృష్ణప్రసాదు .
ఈ రోజు స్పెషల్ .
నేతి బీరకాయ పచ్చడి .
కార్తీక మాసంలో నేతి బీరకాయ తప్పక తినాలని ఎప్పటి నుండో పెద్దలు చెప్పారు .
కారణం కార్తీక మాసం చలి ప్రభావం బాగా ఉంటుంది .
సహజంగానే ఆ ప్రభావం జీర్ణ వ్యవస్ధపై ఉంటుంది .
నేతి బీరకాయ లో పీచు పదార్ధం ఎక్కువగా ఉంటుంది .
మనం తీసుకున్న ఆహారం పూర్తిగా జీర్ణం అవటానికి ఈ నేతి బీరకాయ తో చేసిన వంటకాలను ముఖ్యంగా ఆసమయంలో వాడమంటారు .
నేతి బీరకాయతో కూర చేసుకుంటారు కొంతమంది .
చాలా మంది నేతి బీరకాయ తో పచ్చడి చేసుకుంటారు .
నేను ఇప్పుడు మీకు నేతి బీరకాయతో పచ్చడి ఎలా చేసుకోవాలో తెలియ చేస్తాను.
కొంతమంది ఈ పచ్చడిలో పచ్చి టమోటో లు కూడా కలిపి చేసుకుంటారు.
అలా కూడా పచ్చడి రుచిగానే ఉంటుంది.
ఒకరు నేతి బీరకాయ పచ్చడి చేసాక పచ్చడిలో మూడు స్పూన్లు వేయించిన నువ్వులపొడి కలిపారు .
అలా కూడా రుచిగానే ఉంది.
నేను మామూలుగా చేసుకునే నేతి బీరకాయ పచ్చడి గురించి తెలియచేస్తాను .
నేతి బీరకాయ పచ్చడి .
కావలసినవి.
నేతి బీరకాయలు -- మూడు లేదా అర కిలో .
కాయలు ముదిరితే పచ్చడి పీచుగా ఉంటుంది. అందువల్ల లేత నేతి బీరకాయలు తీసుకోండి.
ఆ కాయలు పై చెక్కు తీయనవసరం లేదు .
శుభ్రంగా కడిగి ముక్కలుగా తరుగుకోవాలి.
పచ్చి మిరపకాయలు -- 8
చింతపండు -- ఉసిరికాయంత
ఉప్పు -- తగినంత
పసుపు -- కొద్దిగా
కొత్తిమీర -- ఒక చిన్న కట్ట .
పోపునకు.
నూనె -- మూడు స్పూన్లు
ఎండుమిరపకాయలు -- 6
మెంతులు -- పావు స్పూను
మినపప్పు -- స్పూను
ఆవాలు -- అర స్పూను
జీలకర్ర -- పావు స్పూను
ఇంగువ -- కొద్దిగా
కరివేపాకు -- మూడు రెమ్మలు
తయారీ విధానము .
ముందుగా స్టౌ మీద బాండీ పెట్టి మూడుస్పూన్లు నూనె వేసి నూనె బాగా కాగగానే వరుసగా ఎండుమిర్చి , మెంతులు , జీలకర్ర , ఆవాలు , ఇంగువ మరియు కరివేపాకు వేసి పోపు వేయించుకుని వేరే ప్లేటులోకి తీసుకోవాలి .
తర్వాత అదే నూనెలో నేతి బీరకాయ ముక్కలు , పచ్చిమిరపకాయలు , కొద్దిగా పసుపు వేసి మూత పెట్టి ముక్కలను బాగా మగ్గనివ్వాలి .
ముక్కలు బాండీలో వేయగానే ముక్కల లోని నీరు బయటకు వస్తుంది .
ఆ నీరు కూడా బాగా ఇగర నిచ్చి మగ్గిన ముక్కలను వేరే ప్లేటు లోకి తీసుకోవాలి.
ఇప్పుడు ముందుగా మిక్సీ లో వేగిన ఎండుమిరపకాయలు , తగినంత ఉప్పు వేసి మెత్తగా వేసుకోవాలి .
తర్వాత చింతపండు కూడా విడదీసి మిక్సీ లో మెత్తగా వేసుకోవాలి .
.
ఇప్పుడు మగ్గిన నేతి బీరకాయ ముక్కలు మరియు పచ్చిమిరపకాయలు వేసి మిక్సీ లో మెత్తగా వేసుకోవాలి .
చివరగా మిగిలిన పోపు మరియు కొత్తిమీర కూడా పచ్చడి లో వేసి ఒకసారి మిక్సీ వేసుకోవాలి .
తర్వాత వేరే గిన్నెలోకి తీసుకోవాలి .
కావలసినవారు మినపప్పు , ఆవాలు వేసి మరోసారి పైన పోపు పెట్టుకోండి.
అంతే .
ఎంతో రుచిగా ఉండే నేతి బీరకాయ పచ్చడి దోశెలలోకి, రోటీలలోకి మరియు అన్నం లోకి సర్వింగ్ కు సిద్ధం.
0 comments:
Post a Comment