పెద్ద ఉసిరికాయల తో పచ్చడి .
ఇది పెద్ద ఉసిరి కాయల ఏడాది నిల్వ పచ్చడి కాదు .
నాలుగైదు రోజులు నిల్వ ఉండే పచ్చడి .
నిల్వ పచ్చడి పెట్టుకోవాలంటే మరో రెండు నెలలు ఆగాలి.
కాయ ముదరాలి .అప్పుడు పచ్చడి నిక్షేపంగా ఏటి కేడాది నిల్వ ఉంటుంది.
మాకు తెలిసిన పక్కింటి వారు వారి ఉసిరి చెట్టు కాయలు కోస్తూ మాకు ఒక కిలో కాయలు ఇచ్చారు .
దానితో రెండు రకముల తాత్కాలికంగా నిల్వ ఉండే పచ్చళ్ళు చేసాము .
అందులో ఈ ఉసిరికాయ పచ్చడి .
కావలసినవి.
ఉసిరికాయలు -- అర కిలో
నూనె -- ఆరు స్పూన్లు
ఎండుమిరపకాయలు -- 20
మెంతులు -- స్పూనున్నర .
ఆవాలు -- స్పూను
ఇంగువ -- కొద్దిగా
పసుపు -- కొద్దిగా
ఉప్పు -- తగినంత
తయారీ విధానము .
ముందుగా స్టౌ మీద ఒక గిన్నెలో మూడు స్పూన్లు నూనె వేసి నూనె బాగా కాగగానే ఉసిరి కాయలు వేసి మూత పెట్టి , పది నిముషాలు మీడియం సెగన మగ్గ నివ్వాలి .
చల్లారగానే కాయలను చేతితో చిదిపి మధ్యన గింజలను తీసేసుకోవాలి .
అవి వేరే ప్లేటులోకి తీసుకుని , ముక్కల పైన పసుపు వేసుకోవాలి .
ఇప్పుడు మళ్ళీ స్టౌ వెలిగించి బాండీ పెట్టి మూడు స్పూన్లు వేసి నూనె బాగా కాగగానే వరుసగా మెంతులు , ఎండుమిరపకాయలు , ఆవాలు మరియు ఇంగువ వేసి పోపు వేయించుకోవాలి .
పోపు చల్లారగానే మిక్సీ లో వేగిన పోపు సరిపడా ఉప్పు వేసి మెత్తగా మిక్సీ వేసుకోవాలి .
తర్వాత మగ్గిన ముక్కలను కూడా వేసి పచ్చడి మెత్తగా వేసుకుని , వేరే గిన్నెలోకి తీసుకోవాలి .
అంతే ఎంతో రుచిగా ఉండి , ఐదు రోజులు నిల్వ ఉండే ఉసిరికాయ పచ్చడి భోజనము లోనికి సిద్ధం.
ఈ పచ్చడి వేడి వేడి అన్నంలో , నెయ్యి వేసుకుని మొదట తింటే అద్భుతమైన రుచిగా ఉంటుంది .
ఆరోగ్యానికి కూడా ఉసిరి పచ్చడి చాలా మంచిది.
0 comments:
Post a Comment