కొత్తిమీర కారం .

కొత్తిమీర కారం .

 ఆలూరి కృష్ణ ప్రసాద్ 

మా చిన్న అమ్మమ్మ మా చిన్నప్పుడు బాపట్ల లో అమ్మకు సాయంగా కొంత కాలం మా దగ్గర ఉంది .

మా చిన్న అమ్మమ్మ చేసేదండీ రోటిలో కొత్తిమీర కారం .

ఆహా ! ఏమి రుచి.

అనరా ! మైమరచి

అనే స్థాయిలో ఉండేది

ఆ కొత్తిమీర కారం.

పొద్దున్న వండినది రాత్రికి ముట్టుకోని మా నాన్నగారు ఫ్రిజ్ లో పెట్టించుకుని అయిదు రోజులు తినే వారు .

అంత బాగా చేసేది మా చిన్న అమ్మమ్మ.

మరి అంత బాగుండే ఆ కొత్తి మీర కారం తయారీ విధానము మీతో పంచు కోవడం నాకు సంతోషంగా ఉంది .

కొత్తిమీర కారం.

కావలసినవి.

ఎండుమిరపకాయలు బాగా గల గల లాడుతూ ఎండినవి -- 12

పచ్చి మిరపకాయలు -- 10

చింతపండు -- 40 గ్రా

ధనియాలు -- నాలుగు స్పూన్లు 

ఉప్పు -- తగినంత 

బెల్లం -- 20 గ్రా

పసుపు -- పావు స్పూను

కొత్తిమీర -- మూడు కట్టలు మరి కాస్త ఎక్కువగా .

ఎంత ఎక్కువ వేసుకుంటే అంత రుచి .

పోపుకు .

ఎండుమిరపకాయలు - 2

పొట్టు మినపప్పు -- స్పూను

ఆవాలు --- అర స్పూను

ఇంగువ --- కొద్దిగా 

నూనె --- మూడు స్పూన్లు

తయారీ విధానము .

ఈ పచ్చడి రోటిలోనే చేసుకుంటే 

 చాలా బాగుంటుంది.

అవకాశం లేని వారు మిక్సీలో వేసుకోండి.

ముందు చింతపండు విడదీసి నీళ్ళలో తడిపి ఉంచుకోవాలి.

కొత్తిమీర ఎక్కువ మోతాదులో తీసుకొని క్రింద కాడలు తీసి కడిగి శుభ్రం చేసుకోవాలి .

అన్నీ కూడా వేయించ కుండా అలాగే వేసుకోవాలి.

ముందుగా ఎండుమిరపకాయలు , ధనియాలు , ఉప్పు వేసి రోటిలో పచ్చడి బండతో మెత్తగా దంపుకోవాలి.

తరువాత తడిపిన చింతపండు ,పచ్చిమిరపకాయలు ( తొడిమలు తీసి కడిగి అలాగే వేసుకోవాలి ) బెల్లం , పసుపు వేసి

బాగా మెత్తగా దంపుకోవాలి .

తర్వాత మొత్తం కొత్తిమీర అంతా రోటిలో వేసి మెత్తగా పచ్చడి బండతో నూరాలి .

కొత్తిమీర , పచ్చి మిరపకాయలు లో తడి ఉంటుంది కనుక నీళ్ళు పోయక్కరలేదు చేసేటప్పుడు .

మరీ గట్టిగా అన్పిస్తే నీళ్ళు చేత్తో చిలకరిస్తే సరిపోతుంది .

రోటి లో నుండి గిన్నెలోకి తీసుకోవాలి .

ఇప్పుడు స్టౌ మీద బాండి పెట్టి నూనె వేసి నూనె కాగగానే ఎండు మిర్చి , మినపప్పు , ఆవాలు , ఇంగువ తో పోపు పెట్టుకొని స్పూను తో బాగా కలుపుకోవాలి .

అంతే వెరైటీ కొత్తిమీర కారం సిద్ధం.

ఈ కొత్తిమీర కారం ఇడ్లీ , దోశెలు మరియు అన్నం లోకి కూడా చాలా బాగుంటుంది .