ఇడ్లీ లోకి కారప్పొడి

ఇడ్లీ లోకి  కారప్పొడి .

 ఆలూరి కృష్ణ ప్రసాద్ 

కావలసినవి .

ఎండు  మిర్చి  --  20

పచ్చి శనగపప్పు  --  పావు కప్పు

చాయ మినపప్పు  --  పావు కప్పు

ధనియాలు  --  పావు కప్పులో  సగం.

కరివేపాకు   దూసినది  --  అర కప్పు .

ఉప్పు  --- తగినంత 

తయారీ  విధానము .

ముందుగా  కరివేపాకు   శుభ్రం చేసుకొని   తడి  లేకుండా  ఆర బెట్టు కోవాలి . 

ఇప్పుడు  స్టౌ  వెలిగించి   బాండీ  పెట్టి  నూనె  వెయ్యకుండా  ఎండు  మిర్చి , ధనియాలు , పచ్చి శనగపప్పు  ,  చాయ మినపప్పు వేసి కమ్మని వాసన వచ్చే వరకు  దోరగా  వేయించుకోవాలి . వేగుతుండగానే  ఆర బెట్టిన  అర కప్పు  కరివేపాకు  కూడా  వేసి  ఆకులో  పచ్చి  పోయేదికా  వేయించుకోవాలి.

చల్లారగానే  ముందుగా ఎండుమిరపకాయలు , పచ్చి శనగపప్పు , చాయ మినపప్పు , ధనియాలు  , కరివేపాకు   మిశ్రమం  తగినంత   ఉప్పు వేసి  మరీ  మెత్తగా   కాకుండా  కొంచెం  పప్పులు  తగిలేటట్లుగా  మిక్సీ  వేసుకోవాలి .

అంతే  ఇడ్లీల లోకి ,  దోశెల లోకి  ఘమ  ఘమ లాడే  వాసనతో  కారప్పొడి   సిద్ధం.

ఈ  ఇడ్లీ పొడి  నెల  రోజులు  పైగా తాజాగా  ఉంటుంది .

*****************************

కరివేపాకు   కారప్పొడి   (  నల్ల కారం ) .

అదే  అన్నం లోకి  అయితే  బాండీలో  నూనె  అయిదు  స్పూన్లు  వేసుకుని  ,

 ఎండుమిరపకాయలు -  25 ,  ధనియాలు  -  అరకప్పు , చాయ మినపప్పు  -  మూడు స్పూన్లు , కరివేపాకు  -  ఒక కప్పు ,

ఆవాలు  --  పావు  స్పూను , జీలకర్ర  --  పావు  స్పూను  వేసి  బాగా  వేయించుకొని  చల్లారిన  తర్వాత  ఈ  మిశ్రమాన్ని   మిక్సీలో  వేసి , తగినంత  ఉప్పు , నిమ్మకాయంత   గింజలు తీసి  రెబ్బలుగా  విడదీసిన  చింతపండు  వేసి  మెత్తగా   మిక్సీ వేసుకోవాలి .

చివరగా  ఓ పది  పొట్టు  తీయని  వెల్లుల్లి   రెబ్బలు  వేసుకోవాలి .

వెల్లుల్లి   ఇష్టం లేని  వారు  మరో  పావు కప్పు  కరివేపాకు   వేసుకోండి .  

అంతే  ఘమ ఘమ  లాడే  నల్ల కారం  (  కరివేపాకు  కారప్పొడి  )

భోజనం  లోకి  సిద్ధం .

********************