క్యాబేజి పెసర మసాలా వడలు

క్యాబేజి  పెసర  మసాలా వడలు .

ఆలూరు కృష్ణప్రసాదు .

కావలసినవి .

ముడి పచ్చ పెసలు  --  150  గ్రా.

క్యాబేజి  --   150  గ్రా.

ఉల్లిపాయలు  -  రెండు

పచ్చిమిర్చి   --  పన్నెండు 

కరివేపాకు   --  మూడు  రెమ్మలు 

పొదినా ఆకు   -  పావు  కప్పు 

శనగపిండి  --  రెండు స్పూన్లు 

అల్లం   ---  చిన్న ముక్క 

జీలకర్ర  --  పావు  స్పూను 

నూనె  --  200  గ్రాములు .

పెసల  వడలు  తయారీ  విధానము  .

ఈ  పెసల  వడలకు  ముడి  పచ్చ  పెసలే  వాడాలి .

పెసర పప్పు  కాని , చాయపెసరపప్పు  కాని  వాడ కూడదు . రుచిగా  ఉండదు .

ముందుగా  ముడి  పెసలు  తగినన్ని   నీళ్ళలో  మూడు గంటల   సేపు  నానపెట్టుకోవాలి .

తర్వాత  నానిన  పెసలలో   ని నీళ్ళు  వంపేసి  మిక్సీ  లో  నీళ్ళు  పోయకుండా  కచ్చా పచ్చాగా  వేసుకోవాలి .

క్యాబేజి  చిన్న  ముక్కలుగా   తరుగుకోవాలి .

ఉల్లిపాయలు  చిన్న  ముక్కలుగా  తరుగుకోవాలి .

పచ్చిమిర్చి  చిన్న ముక్కలుగా  తరుగు కోవాలి .

అల్లం పై  చెక్కు   తీసి  చిన్న ముక్కలుగా   తరుగు కోవాలి .

కరివేపాకు  సన్నగా  తరుగుకోవాలి .

పొదినా  ఆకులు  వలిచి  సిద్ధంగా  ఉంచుకోవాలి .

ఇప్పుడు   ఒక  గిన్నెలో   గ్రైండ్   చేసుకొని  సిద్ధంగా  ఉంచుకున్న   ముడి పెసల  మిశ్రమం , తరిగిన  క్యాబేజి  ముక్కలు , తరిగిన   ఉల్లిపాయల  ముక్కలు , తరిగిన  కరివేపాకు ,

తరిగిన  పచ్చిమిర్చి   ముక్కలు ,  పొదీనా  ఆకు , శనగ పిండి ,  జీలకర్ర  , సరిపడా  ఉప్పువేసి   కొద్దిగా  నీళ్ళు  పోసుకుని  చేత్తో  బాగా  కలుపు కోవాలి .

పిండి  వడలుగా  వేయటానికి  అనుగుణంగా  కలుపు కోవాలి .

ఇప్పుడు  స్టౌ  మీద  బాండీ  పెట్టి  నూనె  మొత్తము   వేసి  నూనె బాగా  కాగిన  తర్వాత  కలిపిన  పిండిని  ఉండలుగా  చేసుకుని   అర చేతితో   చిన్న  వడలుగా  చేసుకొని   నూనెలో  బంగారు  రంగులో  వేయించుకోవాలి  .

అంతే  ఎంతో  రుచిగా  ఉండే  క్యాబేజి  పెసల  మసాలా  వడలు  టిఫిన్  గా  సేవించడానికి  సిద్ధం.

ఈ వడలు  వేడి  వేడిగా  అన్నం లోకి కూడా  చాలా  రుచిగా  ఉంటాయి ,

ఫోటో   --   మా  ఇంట్లో  చేసిన  క్యాబేజి  పెసల వడలు .