శనగపిండి తీపి పచ్చడి
ఆలూరి కృష్ణ ప్రసాద్
ప్రియమిత్రులారా !
మీరు వేడి వేడి ఇడ్లీలలో శనగ పిండి తీపి పచ్చడి ఎప్పుడైనా తిన్నారా ?
ఈ పచ్చడి అందరికీ నచ్చక పోయినా తప్పకుండా పిల్లలకు మరియు కొంతమంది పెద్దలకు నచ్చి తీరుతుంది .
మరి ఈ శనగపిండి తీపి పచ్చడి
తయారీ విధానము గురించి తెలుసుకుందామా !
శనగ పిండి తీపి పచ్చడి .
కావలసినవి .
శనగపిండి --- ఒక గరిటెడు.
పంచదార --- రెండు లేదా మూడు స్పూన్లు.
నెయ్యి -- రెండు స్పూన్లు
చింతపండు --- రెండు రెబ్బలు. లేదా చిన్న ఉసిరి కాయంత.
ఉప్పు --- చాలా కొద్దిగా
పచ్చి మిర్చి --- రెండు . చిన్న ముక్కలుగా కట్ చేసుకోవాలి .
తాలింపుకు కావలసినవి .
ఎండుమిరపకాయలు -- రెండు చిన్న ముక్కలుగా తుంపు కోవాలి.
పచ్చి శనగపప్పు -- స్పూను .
చాయమినపప్పు -- స్పూను
ఆవాలు --- పావు స్పూను
కరివేపాకు -- రెండు రెమ్మలు . తుంపి ఆకులు పోపుకు తీసి పెట్టు కోవాలి.
( ఇందులో మెంతులు , జీలకర్ర , ధనియాలు , ఇంగువ వంటివి వెయ్యకూడదు . )
శనగ పిండి తీపి పచ్చడి తయారీ విధానము .
ముందుగా ఒక గ్లాసు నీళ్ళలో చింతపండు వేసి పల్చగా రసం తీసి వేరేగా ఒక గిన్నెలో పెట్టుకోండి .
చింతపండు పిప్పి పారేయండి .
ఇప్పుడు ఆ గిన్నెలో తరిగి ఉంచుకున్న పచ్చి మిర్చి ముక్కలు వేయండి .
అందులో చాలా కొద్దిగా ఉప్పు వేయండి . పావు స్పూను లో సగం సరిపోతుంది . చాలకపోతే చివరగా రుచి చూసి వేసుకోవచ్చు .
ఇప్పుడు స్టౌ వెలిగించి బాండి పెట్టి రెండు స్పూన్లు నెయ్యి వేసి అందులో శనగ పిండి వేసి కమ్మని వేగిన వాసన వచ్చేదాకా వేయించుకోండి. పచ్చి వాసన పోవాలి .
ఇప్పుడు ఆ వేగిన శనగపిండి ముందుగా సిద్ధం చేసుకున్న ఈ చింతపండు నీళ్ళలో వేసి , ఇందులో పంచదార కూడా వేసి గరిటతో బాగా కలుపుకోండి .
మళ్ళీ స్టౌ మీద బాండి పెట్టి రెండు స్పూన్లు నెయ్యి వేసి ఎండు మిర్చి ముక్కలు , పచ్చి శనగపప్పు , చాయమినపప్పు , ఆవాలు , కరివేపాకు వేసి పోపు వేగగానే ఈ పచ్చడి లో కలుపుకోండి.
అంతే . ఎంతో రుచిగా ఉండే శనగపిండి తీపి పచ్చడి వేడి వేడి ఇడ్లీలలోకి సిద్ధం.
ఈ ప్రయోగం నేరుగా మీ శ్రీవారి మీద కాకుండా ముందు పిల్లలకు పెట్టి వారికి నచ్చితే ముందడుగు వేయండి.
ఈ పచ్చడి మా అన్నదమ్ముల కోసం ఇడ్లీలలోకి మా అమ్మ చేసి పెట్టేది.
ఆ రోజుల్లో ఈ పచ్చడి కోసం అన్నదమ్ములము పోటి పడేవాళ్ళం.
0 comments:
Post a Comment